Dili-SMI, Relasiona ho polítika redasaun GMN-TV kona-ba transmisaun direta kampaña partidu polítika periodu kampaña eleiotrál, Conselho de Imprensa - CI bolu atensaun GMN-TV atu halo separasaun lolos entre programa informativu ho publisidade polítika no komersiál hodi nune’e bele fó informasaun lolos ba públiku.
“Ami nia atensaun ba GMN ninian ne’ebé halo trasmisaun direta ba kampaña sira, ami nia preokupasaun ho karakter kampaña hanesan agora ne’ebé ke lider sira barak buka insulta malu, ke’e malu, entaun trasmisaun direta ne’e imposibilita ita atu taka liafuan balun ga ou halo edisaun ba liafuan balun ne’ebé ke lolos la serve, la dignu atu fahe ba konsumidores”, dehan Prezidente CI, Virgilio da Silva Guterres, liu husi Konfrensia Imprensa iha Kintal-Boot, Sesta, (27/04).
Tuir Virgilio katak maske laiha kuadru legál ruma ne’ebé bandu ba orgaun komunikasaun sosiál atu labele halo transmisaun direta maibe orgaun komunikasaun sosiál ne’ebé hakarak halo transmisaun diretu presiza halo kumprimisiu ba partidu polítika sira atu kuidadu linguazen durante kampaña.
Iha biban ne’e mós, Virgilio esplika katak rezultadu provizoriu monitorizasaun no análiza CI katak mídia nasionál sira sira nia publikasaun kontinua viola kódigu étika jornalístiku nian, liu-liu publikasaun kona-ba partidu polítiku durante periodu kampaña eleitorál nian.
Eis Prezidente Asosiasaun Jornalista Timor Lorosa’e - AJTL hatutan infrasaun sira iha públikasaun liu-liu kódigu étika jornalístiku pontu 6 no prinsipiu universal jornalizmu nian hanesan balansu. Maioria públikasaun mídia nasionál sira kontinua promove konteúdu provokativu, la’os edukativu no programa partidu polítiku nian.
Nia kontinua esplika katak RTTL rasik nu’udar orgaun komunikasaun sosiál públiku nian seidauk fó informasaun ne’ebé masimu kona-ba eleisaun tanba RTTL hasai programa regular balun ho razaun atu fó espasu ba notisiariu eleisaun nian, maibe realidade la akontese.
“Informasaun ne’ebé RTTL fó sai ba públiku kona-ba eleisaun seidauk masimu, liu-liu iha Rádiu ninian ho “voz do crocodile” ne’e hasai tiha programa regular balun ne’ebé ke durante ne’e la’o hanesan lingua Portugesa ninian hasai tiha ho intensaun atu tau fila fali informasaun sira ne’ebé relasiona ho eleisaun, maibe ami haree katak informasaun liu-liu iha pakote notisia ninian informasaun kona-ba eleisaun ninian la dun mosu”, dehan nia.
Nia mós informa CI sei kontinua monitoriza públiksaun prodútu jornalistika kanál mídia sira lor-loron durante periodu kampaña eleitorál eleisaun antisipada nian. (Editor, Mateus Barros).
