Dili-SMI,Hodi kontribui ba transparansia no akuntabilidade iha eleisaun antisipada, Rede Observador Nasionál Timor-Leste – RONETIL fó ona formasaun ba ninia membru hamutuk 400 resin ne’ebé sei koloka ba teritoriu laran hodi observa direta eleisaun antisipada.
Kordenador Jerál RONETIL Laurentino Alves esplika katak razaun fundamentu husi formasaun ba membru RONETIL nu’uda parte ida atu fó kapasitasaun ba observador atu nune’e bele kontribui ba transparansia iha eleisaun antisipada.
“Objetivu husi Treinamentu ida ne’e hanesan fatin eventu ida hodi fó kapasitasaun informasaun kona-ba papél knaar no responsabilidade nu’udar Observadores. Nune’e mós hanesan observador sira bele hatene direitu no dever, saida mak sira atu halo hanesan Observadores ida ne’ebé mak Indepedente”, dehan Laurentino iha Salaun FONGTIL, Kaikoli, Segunda, (30/04).
Laurentino esplika katak formasaun ba membru sira ne’e importante tebes hodi nune’e bele halo separasaun kona-ba partidu polítiku no hala’o knár nu’udar observador ne’ebé independente.”
“Enkkontru ida ne’e importante tebes hodi garantia katak Indepedente nu’udar Observador ida ne’ebe profisionál no iha realidade ba partidus sira hodi nune’e separa katak kapasitasaun prinsipiu nomos kestaun hanesan observador ne’e tenki iha imparsialidade”, dehan Laurentino.
Alves hatutan RONETIL nia membru observador hamutuk 400 resin ne’e sei hala’o observasaun iha munisipiu 11 inklui RAEOA husi kampaña eleitorál to’o apuramentu nasionál
RONETIL ne’e kompostu husi NGO hirak hanesan S-DESK, OJP, Visaun Foin Sa’e, BANO no BALOS. (Editor, Mateus Barros).
