Dili-SMI, Sekretariu Estadu Juventude no Traballador – SEJT, Nívio Magalhães rejeita kona-ba informasaun ne’ebé espalla iha mídia sosiál katak kandidatu traballador timor-oan ne’ebé atu ba serbisu iha Australia fuma sigaru no baku pramugariu iha aviaun laran.
“Informasaun husi media sosiál kona-ba kandidatu traballador Sr. MM fuma sigaru iha aviaun laran no baku pramugari ne’e la los, maibe Sr. MM kona “kesurupan” hodi halo nia hakilar iha aviaun laran no halo reazen hasoru pramugari”, dehan Nívio liu husi komunikadu imprensa ne’ebé SMI asesu iha Sexta, (04/05) foin lalais ne’e.
Iha komunikadu ne’e esplika katak atu klarifika kona-ba akontesementu ne’e loloos ba públiku SEJT Nívio Magalhães bolu kandidatu traballador ho insiál MM ho ninia familia hodi husu kona-ba verasidade akontesimentu iha momentu ne’ebá.
Durante enkontru ho SEJT, kandidatu traballador “MM” esplika katak nia rasik lahatene saida mak akontese iha tempu refere maibe hafoin nia hakfodak iha ona eskuadra polisia nian. Tuir familia MM katak kandidatu traballdor ne’e laiha moras maibe tanba problema adat iha uma laran.
“MM la iha moras maibe “iha duni problema uma laran tuir kultura Timor nian ne'ebé halo nia hetan problema ne'e”, tuir komunikadu ne’e esplika.
Relasiona ho akontesementu ne’e, SEJT esplika katak atu asegura programa haruka traballador ba estranjeiru mak iha futuru la’os deit teste saude fiziku maibe mós teste saude mental ba kandidatu traballador sira.
Tanba tuir nia katak traballador sira ne’ebé Governu Timor-Leste haruka ba estranjeiru la’os deit lori nia naran no familia maibe lori estadu no nasaun nia naran.
Ho nune’e, nia hatutan katak sei halo selesaun rigrozu ba kandidatu traballador sira iha futuru hodi nune’e bele garante dignidade nasaun no estadu iha mundu. (Editor, Lariwa).
