Dili-SMI, Prezidente Conselho de Imprensa de Timor-Leste – CI-TL, Virgilio da Silva Guterres esplika katak durante ne’e instituisaun ne’ebé nia lidera rejistu kazu tolu (3) kona-ba diskriminasaun no mal-tratamentu husi entidade privadu no públiku hasoru jornalista sira iha terenu.
“KI rejista kazu dudu ses no duni kameran person profisionál iha Aeroprtu Dili loron 11 Marsu husi pesoal balun komisaun organizadora ne’ebé simu xefe negosiador Kay Rala Xanana Gusmão, seluk mós iha loron 8 Janeiru membru polisia Tranzitu balun bandu jornalista husi GMN TV nian hodi halo kobertura ba check point ne’ebé sira halo, iha kazu violénsia husi seguransa gardamor halo hasoru jornalista sira TVTL nian inisiu Abril 2017 iha edifisiu Ministériu Finansa”, dehan Virgilio hafoin selebra loron Liberdade Imprensa iha Bekora, Kinta, (03/05).
Husi dadus ne’ebé CI rejista, Virgilio konsidera sai nu’udar sasidik ida ne’ebé Timor-Leste infrenta intermu Liberdade imprensa mak entidade barak seidauk kompriende kona-ba serbisu jornalista nian ne’ebé sempre mosu diskriminasaun iha fatin-fatin wainhira halo atividade kobertura.
Nia aumenta, maske sei iha sasidik balun maibe tuir relatóriu “reporters Without Borders” hatudu katak Timor-Leste kontinua lidera nasaun sira iha rejiaun sudeste aziatiku kona-ba Liberdade imprensa ne’e rasik.
“Indeks globál kona-ba liberdade impresa haksoit husi númeru 98 iha tinan kotuk ba 95 iha tinan ne’e no kontinua lidera ba pais sira iha rejiaun sudeste asiatiku”, dehan Guterres.
Ho nune’e, Prezidente CI ne’e husu ba públiku atu respeitu orgaun no meiu komunikasaun sosiál nia papél hodi labele halo impedementu ka diskrimina jornalista wainhira hala’o atividade kobertura jornalizmu nian.
Iha parte seluk, Prezidente Timor Leste Press Union – TLPU, Francisco Simões Belo apela ba jornalista sira atu kontinua nafatin esforsu hodi halo serbisu ho profisionál nomós luta kontra diskriminaaun hasoru jornalista iha mundu no espesiálmente iha Timor-Leste.
“Hau hakarak fo mensagen ba ita hotu atu kontinua nafatin ita nia serbisu ho profisionál ita luta kontra diskriminasaun ho disigualidade sosial ne’ebé akontese hasoru jornalista sira liu-liu kontra intervensaun ne’ebé la favorese ba ita nia independesia editorial”, dehan Belo.
Iha biban selebrasaun loron mundial imprensa ne’e, Prezidente CI no Prezidente TLPU fó sira nia parabéns ba jornalista timor-oan nomós jornalista iha mundu tomak. (Editor, Lariwa).
