Gana-SMI, Conselho de Imprensa de Timor-Leste (CI-TL), partisipa iha komemorasaun loron mundiál Liberdade Imprensa, ne’ebé selebra iha kontinente Áfrika, nasaun Gana, iha Sidade Accra, iha loron 3 Maiu 2018.
Selebrasaun iha tinan ida ne’e ho tema “Keeping Power in Check: Mídia, Justice and the Rule of Law”, partisipa hosi péritu mídia sira iha mundu hodi diskuti kona-ba asuntu sira ne’ebé daudaun ne’e sai ameasa ba liberdade imprensa iha mundu, no oinsá mantein dixiplina verifikasaun hodi hasoru notísia falsa no diskursu ódiu.
Iha ámbitu komemorasaun loron mundial liberade Imprensa, Jornalista Investigativu ICFJ Knight Fellow, Catherine Gicheru hatete prezensa mídia sosiál nian sai hanesan ameasa boot ba mídia sira professional.
“Ita hare katak mídia sosiál ninia influensia boot tebes. Ema barak mak uza mídia sosiál hodi lansa sira nia intensaun sira. Ami nia esperiénsia, ami kria liña verifikasaun faktus hodi hatan buat ida ne’e. Ami uza mídia sosiál WhatsApp hodi fahe informasaun entre ami atu bele redus informasaun falsa sira ne’e,” dehan Catherine Gicheru, Jornalista Investigativu ICFJ Knight Fellow.
Nia hato’o agradese wa’in ba partisipantes hotu ne’ebé hola parte ona iha diskusaun sira pertenente tebes hodi fortifika liberdade imprensa, fó espresaun hodi harii ponte ida, atu bele hametin liberdade ne’e sai kondisaun real.
Iha sesaun plenária dahuluk nian ne’ebé ko’alia sobre dezafiu foun ba liberdade imprensa hafoin tinan 25 halo tiha deklarasaun Windhoek, hatudu oinsá poder polítika hahú kontrola no limita liberdade imprensa.
Relatóriu UNESCO nian kona-ba Liberdade Espresaun no Dezenvolvimentu Mídia iha mundu agora nian hatudu ona katak iha nasaun sira ne’ebé mezmu ninia liberdade espresaun garantida konstitusionalmente, dezenvolvimentu polítika no mudansa poder sai-tiha-ona tren ba limitasaun liberdade imprensa.
Durante sesaun diskusaun, Jestór Seniór Polítika, World Wide Web Foundation, Nnenna Nwakanma enkoraza ema hotu atu hola parte iha momentu ida ne’e atu defende liberdade imprensa no liberdade espresaun.
Iha sesaun ne’e mai ho konkluzaun ida katak dezafiu foun, ligadu ba dezenvolvimentu polítika, teknolojia avansadu no siguransa nasionál, presiza advogadu sira liberdade imprensa nian atu luta nafatin hodi hametin no haburas liberdade imprensa ne’e iha mundu.
Iha sesaun ne’e deskobre katak iha mundu, eleisaun nu’udar besi-asu ba desinformasaun, manipula eleitores, aktu oioin anti-demokrasi ne’ebé mak nunka mosu antes hodi hasoru fontes notísia ne’ebé mak ema bele tau fiar.
Tanba ne’e tenki iha tekniku foun atu asegura verifikasaun faktus informasaun bele la’o lalais-liu informasaun falsa sira, organizasaun profisionál mídia sira presiza hametin fiar no asegura ninia audensia sira iliteradu, oragnizasaun mídia sira tenki luta kontra esforsu sira ba taka internete ne’ebé halo ona atu redus informasaun importante durante eleisaun, jornalista no espertu sira seluk tenki luta kontra desinformasaun iha tempu agora.
Iha biban ne’e, Vise Xefi Redasaun, CNN Indonesia, Nezar Patria hatete “Ami hahú ona halo advokasia atu tau materia teknolojia iha kurikulum eskola nian atu hahú eduka ona ami nia jerasaun sira hodi hasoru dezafiu sira teknolojia modernu ohin loron nian”.
Entretantu, Mira Milosevic, Diretora Ezekutiva Global Forum for Mídia Development prefere auto-regulasaun atu labele hamate liberdade espresaun.
“Hau hanoin katak governu la presiza halo regulamentu atu kontrola, ne’e kontra ona direitu fundamental ema nian atu ko’alia. Auto-regulasaun naton ona, tanba ema presiza hatene katak fó liberdade ba nia atu ko’alia maibe ho responsabilidade.” dehan Mira Milosevic.
Selebrasaun loron mundiál ne’e organiza fila-fali iha kontinente Áfrika bainhira iha tinan 1991 halo adopsaun ba Deklarasaun Windhoek iha Namibia, ne’ebé deklara kona-na importansia hosi independénsia mídia, livre no pluralistik atu hodi haburas no hakiak demokrasia.
Seremonia istóriku ne’e lori espertu sira mídia nian hosi nasaun sira iha kontinente Áfrika, Eropa nomós Asia no Pasífiku inklui Conselho de Imprensa de Timor-Leste hanesan Konselleru, José Maria Ximenes, Konselleru Hugo Maria Fernandes no Diretora Ezekutiva, Ana Teresa Sequeira. (Editor, Mateus Barros).
