Dili-SMI, Diretúr Ezekutivu Asosiasaun HAK Manuel Monteiro senti lamenta kona-ba prosesu justisa iha rai-laran tanba prizionariu sira balun labele asesu sira nia defensor durante prosesu nia kazu iha tribunál.
Ho nune’e, Manuel hatutan katak HAK hamutuk ho rede apoiu prizionál selu hodi formula hanoin hodi sujere ba governu foun atu bele tau matan ba prizionariu sira atu nune’e bele asesu sira nia defensor.
“Tamba ne’e hak hamutuk ho membru rede apoiu prizional seluk atu formula ba governasaun foun ne’ebe mai atu tau matan ba sistema judisiariu iha ita nian rain, prizonierus sira wainhira atu hato’o buat ruma susar ba sira atu hato’o ba se”, dehan Manuel Monteiro iha Salaun Ministériu Justisa, Kaikoli, Tersa, (08/05).
Nia hatutan, tuir HAK nia monitorizasaun hatudu katak dadaun ne’e prizoneiru iha Becora hamutuk ema na’in 600 resin ne’ebé presiza hetan atensaun masimu husi Governu atu nune’e bele hetan justisa ho kualidade no justu.
Iha fatin hanesan Ministra Justisa Maria Angela Crascalão esplika prizioneiru iha diretu atu asesu justisa formal ne’ebé konstituisaun garante. Maibe, tuir nia katak presiza haree mós lei seluk no kovensaun internasional sira ne’ebé Timor-Leste asina ona.
“Haree ba direitu prezioneirus sira nian liu-liu kona-ba sira nia asesu ba direitus justisa formal, hanesan ministru da justisa hanoin katak tenke haree lei hotu-hotu i konvensaun hotu ne’ebé ita asina kedas iha Timor-Leste”, dehan Angela.
Nia kontinua no sujere ba Governu foun atu aloka orsamentu hodi konstrui fila fali prizaun Baucau atu nune’e bele responde ba problema kondisaun infra-estrutura prizaun iha Timor-Leste. (Editor, Mateus Barros).
