Dili-SMI, Ministru Defeza no Seguransa Jose Agustinho Sequeira “Somotxo” relata asuntu polítika no seguransa iha rai-laran ba Prezidente Repúblika Francisco Guterres “Lu-Olo” liu-liu kona-ba kampaña eleitorál husi partidu polítiku sira durante ne’e.
“Hau mai relata kona-ba situasaun tomak iha Timor-Leste iha munisipiu sanulu resin rua (12) inklui regiaun espesiál administrativa Oe-cusse Ambeno (REAOA), kona-ba situasaun kampaña ne’ebé hahu iha loron 10 fulan Abril, agora ita iha ultimo dia buat hotu-hotu lao diak”, dehan nia hafoin remata enkontru ho PR iha Palasiu Prezidensial Aitarak-Laran, Tersa, (08/05) foin lalais ne’e.
Iha biban ne’e, Ministru Somotxo apresia ba lider polítiku sira ne’ebé durante ne’e tun ba terenu hodi hala’o kampaña eleitorál to’o ho remata ho situasaun hakmatek no laiha violénsia ne’ebé estraga estabilidade nasionál.
Nia mós fó apresiasaun ba povu Timor-Leste tomak ne’ebé hatudu ona sira ona maturidade no boa-vontade hodi kontribui ba estabilidade nasionál maske mosu tensaun polítika entre lider partidu sira ne’ebé insulta no ataka malu iha periodu kampaña eleitorál nian.
“Fó parabéns ba povu tomak nomos ba lider polítiku sira ne’ebé apesar de linguagem as vezes insultu mak barak la koalia programa maibé povu hatene ona katak laiha nesesidade para atu oho malu tan, hanesan kria instabilidade ida bo’ot durante kampaña ida ne’e”, dehan Somotxo.
Eis guerileiru ne’e mós apresia no louva sebisu Polisia Nasional Timor Leste – PNTL no FALINTIL-Forsa Defeza Timor Leste – F-FDTL ne’ebé hatudu sira nia esforsu maka’as hodi asegura siguransa durante periodu eleitorál nian.
Nia kontinua apela ba públiku tomak atu kontinua hatudu vontade diak hodi hametin paz no hakmatek to’o rezultadu eleisaun antisipada nian.
“Husu ba ita hotu atu kontribui ba estabilidade nafatin to’o formasaun governu, mantein nafatin espiritu ida ne’e para lori ita nia nasaun ne’e ba desenvolvimentu. (Editor, Mateus Barros).
