Dili-SMI, Partidu Polítku - ParPol no Koligasaun Partidaria ne’ebé hala’o primeiru debate iha loron Tersa, (08/05) foin lalais hanesan FRETILIN, AMP no PD promete sei fó subsidiu ba mídia sira wainhira sira nia partidu manan iha eleisaun antesipada.
Antonino Bianco ne’ebé reprezenta husi partidu FRETILIN mós deklara iha sesaun debate katak sei aloka orsamentu hodi reforsa no hasa’e kapasidade jornalista nian tanba mídia nu’udar ajente prinsipál iha prosesu konstrusaun estadu.
“Tenki tau matan ba jornalista sira, fó salariu minimu lei iha ona. Anualmente orsamentu estadu ne’ereforsa para atu bele kapasita sira ninia kualidade”, dehan Bianco.
Promesa hanesan mós mai husi Prezidente PD Mariano “Assanami” Sabino katak mídia pilar importante husi demokrásia tanba ne’e sei fó subsidiu ba instituisaun mídia sira tantu privadu no estadu nian.
“Laiha liberdade mak demokrasia mate, ba PD mídia importante tebes, PD mak manan promete sei fó subsidiu ba midia hotu-hotu la’os deit TV ho rádiu maibé ba mídia hotu-hotu”, dehan Assanami.
Partidu Aliansa Mudansa ba Progresu – AMP ne’ebé reprezenta husi Fidelis Leite magalhães afirma katak wainhira manan iha eleisaun antesipada sei fó fundu ba mídia hodi dezenvolve kapasidade jornalista nomós kontinua hametin liberdade imprensa iha Timor-Leste.
Nune’e mós partidu no koligasaun partidaria sira seluk mós iha programa no polítika hodi kontinua promove no hametin liberdade imprensa iha rai-laran. (Editor, Mateus Barros).