Dili-SMI, Komandu Polisia Nasional Timor-Leste deside ona hodi koloka Unidade Polisia Fronteira - UPF, Unidade Polisia Maritima – UPM no Unidade Espesial Polisia – UEP hodi apoiu unidade seluk atu garante eleisaun antesipada ne’ebé sei hala’o iha loron 12 Maiu tinan ida ne’e.
“Iha prosesu dezlokasaun ne’e iha unidade tolu (3) mak sei reforsa ba seguransa iha munisipiu mak hanesan unidade maritima, unidade espesial polisia no unidade polisia fronteira, totál ba membru ne’ebé mak atu dezloka ba munisipiu sira hau labele fo sai tamba ne’e segredu ba operasaun ninian”, dehan Komandante PNTL, Komisariu Julio da Costa Hornay wainhira halo ninia diskursu iha seremonia dezlokasaun iha Kuartel Jerál, Kaikoli, Kinta, (10/05).
Iha seremonia dezlokasaun ne’e, Komisariu Julio Hornai husu ba membru tomak atu hala’o knaar tuir misaun ne’ebé mak iha no hatudu nafatin disiplina serbisu ne’ebé profisionál, neutralidade no imparsialidade.
Nia mós fó hanoin ba komandante PNTL iha Munisipiu sita atu tau atensaun masimu ba estudante sira ne’ebé fila munisipiu ho atributu partidu nian tanba periodu kampaña eleitorál remata ona.
“Husu ba komandante munisipiu sira atu haree nafatin estudante sira ne’ebé mak halo viajen ba munisipiu ho atributu partidu nian, kampaña remata ona, atu hapara tiha atributu sira para bele entrega fali ba partidu”, dehan Julio.
Komandante Jerál mós apela ba públiku atu labele halo barallu ka koko atu halo krime iha sentru votasaun tanba PNTL sei halo atuasaun ho seriadade tanba atu asegura prosedsu eleisaun antesipada nian. (Editor, Mateus Barros).
