Dili-SMI, Rezultadu monitorizsaun Conselho Imprensa - CI ba periodu kampaña eleitorál indentifika katak mídia nasionál balun kontinua komete erru no viola kódigu étika jornalístiku liu husi públikasaun notísia lor-loron.
Tuir Prezidente CI, Virgilio da Silva Guterres katak erru ne’ebé mídia komete maka hanesan públikasaun notisia ho fonte uniku, seidauk tau atensaun masimu ba kestaun akurasia, balansu no imparsialidade.
“KI nafatin Preukupa ba notísia barak husi jornál nomós husi rádiu no televizaun, mídia elektronika ninian, mídia barak sei nafatin halo sala ne’ebé durante ami identifika ona fonte unika ka (sumber tungal) laiha check ho re check ba fontes sira seluk ne’ebé implikadu iha notisia laran:, dehan Virgilio liu husi Konfrensia imprensa iha edifiu CI, Kintal-Boot, Kinta, (10/05).
Prezidente CI hatutan katak surante periodu kampaña, CI mós identifika blogspot no online sira ne’ebé produz informasaun falsu sira hodi públika ba públiku.
“Materia ne’ebé ami identifika katak iha kampaña eleitorál eleisaun antisipada ida ne’e informasaun falsu mós aumenta, liu-liu iha parte online ninian ita haree blogspot”, dehan nia.
Husi erru ne’ebé CI identifika kona-ba públikasaun mídia nasionál durante kampaña eleitorál, CI husu ba xefe redasaun no editor sira tenke kuidadu no halo check and re-check informasaun atu nune’e bele públika notísia ho kualidade iha futuru. (Editor, Mateus Barros).
