Dili-SMI, Prezidente Partidu Demokratiku – PD Mariano “Asanami” Sabino apresia no louva orgaun eleitorál hanesan Sekretariadu Tekniku Administrasaun Eleitorál – STAE no Comissão Nacional Eleições – CNE ne’ebé halo ona serbisu ho imparsiál hodi organiza prosesu eleitorál iha eleisaun antesipada ho susesu.
“Partidu Demokratiku apresia servisu orgaun eleitorais sira CNE - STAE tantu iha rai laran no iha rai liur ne’ebé hala’o sira nia knar ho profesionál. PD mós orgullu, mezmu sei hasoru difikuldades oi-oin, timor oan rasik mak lidera no organiza prosesu eleitoral hotu”, dehan Mariano liu husi Konfrensia Imprensa iha Sede Partidu Kolmera, Segunda, (14/05).
Iha biban ne’e, Mariano mós fó agradese no kongratula ba membru no komandau FALINTIL-Forsa Defeza Timor Leste – F-FDTL no Polisia Nasional Timor Leste – PNTL ne’ebé hatudu ona responsabilidade hodi garante estabilidade durante periodu eleitorál to’o rezultadu eleisaun nian.
“PD hakarak apresia mós komandu PNTL no F-FDTL ho nia membru sira hotu ne’ebé hatudu duni sira nia profisionalizmu no responsabilidade hodi garante estabilidade iha rai laran ho nune’e povu tomak senti hakmatek hala’o sira nia direitu demokratika iha Eeleisaun Antisipada liu ba”, tenki Asanami.
PD hakru’uk hato’o agradece wain ba militantes no estrutura PD iha timor laran tomak,maske iha difikuldades oi-oin balun hetan ameasas no insulta iha prosesu eleisaun maibe povu firme nafatin i defende nafatin.
Prezidente PD ne’e mós hato’o ninia agradesementu wain ba militante no estrutura partidu nian iha teritoriu laran ne’ebé halo ona esforsu hodi lori partidu liu bareira hodi tuur iha Parlamentu Nasional – PN, iha governasaun foun mai.
Lider masimu PD ne’e mós fó ninia parabéns ba AMP ne’ebé hetan votu maioria iha eleisaun antesipada ne’ebé realiza iha loron 12 Maiu 2018.
Rezultadu kontajen eleitorál provizoriamente husi parte STAE nian hatudu katak iha partidu PD rasik hetan kadeira 5 iha Parlamentu Nasional foun mai. (Editor, Mateus Barros).
