Dili-SMI, Rezultadu provizoriu eleisaun antesipada hatudu katak Aliansa Maioria ba Progresu – AMP mak manan ona maioria absoluta ho kadeira 34 ne’ebé sei harii governu foun iha tempu badak nia laran, maibe seidauk serteza loloos sé mak sai Primeiru Ministru - PM, karik Kay-rala Xanana Gusmão ka Taur Matan Ruak ne’ebé nu’udar figura sentrál iha AMP ne’e refere.
Tuir deputadu partidu CNRT Arão Noe katak normalmente lider masimu AMP mak sei sai PM maibe sei deside iha orgaun masimu tanba AMP rasik iha ona akordu ofisiál koligasaun kona-ba sé mak atu sai PM.
“Ami iha komprimisiu ona katak iha figura ida ke bele determina Primeiru Ministru ne’e mak sé, normalmente iha estrutura ami AMP, Prezidente AMP maun boot Kayrala Xanana Gusmão, la sei sala husi ne’eba, maibe hau lakohi temi lai tamba ida nee desizaun orgaun masimu AMP nian. Mais iha ona akordu ida ofisiál AMP ninia koligasaun ne’e hatete ona sé mak lidera”, dehan Arão Noe ba SMI iha Salaun Lalini-Larigutu CNE, Segunda, (14/05).
Arão Noe hatutan katak estruturamente AMP iha lider determinante sira ne’ebé sei prontu atu asumi kargu nu’udar PM, maibe nia rasik seidauk bele fó sai ba públiku sé loos mak kaer pasta PM refere.
Tuir rezultadu kontajen eleitorál provizoriamente husi parte STAE nian hatudu katak iha partidu politiku rua hanesan PD hetan kadeira 5, Partidu FRETILIN hetan kadeira 23 no Frente Dezenvolvimentu Demokrátiku – FDD hetan kadeira 3 no Aliansa Maioria ba Progresu – AMP hetan kadeira 34. (Editor, Mateus Barros).
