Dili-SMI, Comissão Nacional de Eleicões – CNE hahu ohin (tersa) to’o kinta feira sei halo apuramentu nasionál hodi nune’e bele valida bulletin de votus iha eleisaun antesipada ne’ebé hala’o iha loron 12 Maiu foin lalais ne’e.
Adjuntu Prezidente Partidu FRETILIN Cipriana Pereira ne’ebé nu’udar fiskais partidu nian esplika katak apuramentu nasionál husi parte CNE nu’udar parte importante atu valida bulletin de votus ne’ebé hetan reklamasaun.
“Apuramentu nasional atividade ne’ebe importante ikus liu, objetivu husi apuramentu ne’e atu valida reklamasaun buletin votus ne’ebe mak hetan reklamasaun”, dehan Cipriana iha Salaun Lalini-Larigutu CNE, Tersa, (15/05).
Tuir nia katak nu’udar fiskais partidu senti sastifas ho atividade apuramentu nasionál ne’ebé hahu loron primeiru (Tersa feira ohin) no importante atu garante transparansia no akutabilidade ba públiku kona-ba prosesu apuramentu nasionál ne’e rasik.
Iha biban seluk, Prezidente CNE, Alcino Baris hateten tuir lei CNE tenke halo fali apuramentu nasionál husi rezultadu kontazen bulletin de votus ne’ebé STAE halo ona.
Maibe, nia hatutan karik liu husi apuramentu nasionál ne’e CNE identifika buat ruma ne’ebé la klaru mak CNE rasik sei buka hatene hodi justifika ba públiku.
Nia mós esplika katak sistema apuramentu nasionál ne’ebé CNE halo la hanesan ho sistema apuramentu iha nivel munsipiu ne’ebé ninia rezultadu fó sai ona ba públiku. (Editor, Mateus Barros).
