Dili-SMI, Futuru VIII Governu ne’ebé sei lidera husi Aliansa Maioria ba Progresu – AMP ne’e, Frente Dezenvolvimentu Demokrátiku – FDD prontu atu apoiu ba governasaun AMP karik hetan konvida, maibe parte Partidu Demokrátiku – PD no Fretilin hili sai opozisaun iha Parlamentu Nasionál – PN.
Prezidente Konsellu Politika Nasionál FFD Agostinho Gomes koalia ba mídia nasionál iha Hotel Novo Turizmu hafoin reuniaun avaliasaun partidu katak prontu atu apoiu governasaun AMP karik hetan konvite.
"FDD mantein nia postura no prontu atu koliga ho se deit. Rezultadu provizoriu hatudu AMP manan, wainhira konvida ami prontu ajuda“, dehan Agostinho iha Hotel Novu Turizmu, Tersa, (15/05).
Nune’e mós intervista ketak SMI ho Prezidente FFD Antonio de Sá Benevides esplika katak FDD nu’udar forsa alternativa ne’ebé sempre prontu atu koliga ho se deit wainhira atu serbi povu no nasaun.
‘‘FDD hakarak sai forsa alternativa atu fó solusaun ba situasaun ruma ne‘ebé ke la dun diak, ami prontu atu kopera ho se deit atu rezolve kestaun nesesiadade povu nian“, dehan Benevides.
Maibe, partidu rua hanesan PD no FRETILIN prefere sai opozisaun duke halo koligasaun ho AMP.
Vice Prezidente Partidu FRETILIN, Francisco Branco informa katak FRETILIN sei sai opozisaun iha PN no sei la kopera prosesu tomak husi Governasaun AMP nian.
‘‘Ami hakarak duni sai oposizaun, oposizaun los i ami sei lakopera iha prosesu ida ne‘e nia laran,” dehan Branco ba mídia nasionál iha sede CCF, Comoro, Dili, Segunda, (14/05).
Afirmasaun hanesan mós mai husi Sekretáriu Jerál FRETILIN Mari Alkatiri katak sei halo aliansa ho partidu seluk, wainhira halo aliansa karik ho ninia partidu aliadu sira.
Iha parte seluk, Sekretáriu Jerál Interinu PD Arcanjo Leite ne’ebé SMI intervista liu husi telefone esplika katak atu halo koligasaun ho AMP ka lae sei deside iha konfrensia nasionál partidu nian. Maibe, nia hatutan katak wainhira konfrensia deside atu sai opozisaun mak partidu sei kumpri desizaun refere. (Editor, Lariwa).
