Dili-SMI, Sekretáriu Estadu Juventude no Traballu – SEJT, Nivio Leite Magalhães hateten katak joventude Timor-Leste agora no ba futuru tenke sai nu’udar autór ba paz no estabilidade iha rai-laran hodi nune’e bele kontribui ba dezenvolvimentu nasionál.
Lia hirak ne’e hato’o husi Nivio Magalhães wainhira hala’o ninia palestra iha semináriu ho tema “Valoriza no Habelar Espiritu 20 Maiu 2002 ne’ebé organiza husi Grupu Kadalak, iha Salaun Madre Canossian Bekora, Kinta, (17/05).
Liu husi palestra, Nivio relata polítika VII Governu nian ne’ebé fó atensaun masimu ba joventude liu husi formasaun no kapasitasaun iha area oi-oin tanba joventude nu’udar ajente importante ba dezenvolimentu nasaun iha futuru.
Nivio mós fó ninia vizaun katak atu kontribui hodi dezenvolve no prepara diak liu rekursu umanu joventude iha futuru oin mai, Governu presiza tau ka establese fundu nasionál ba joventude Timor-Leste.
Natalino De Jesus Dias nu’udar Prezidente Grupu Kadalak atu selebra loron restaurasaun independente ne’ebé sei monu iha loron 20 Maiu, mak grupu Kadalak realiza semináriu nasionál nu’udar parte ida atu selebra loron importante ba povu no nasaun ne’e.
Semináriu partisipa husi orador no peritu nasionál sira no hetan partisipasaun husi eskola sekundária no universitariu sira hanesan UNTL, UNITAL no Instituisaun Superior Filozofia no Teknika – ISFIT. (Editor, Mateus Barros).
