Dili-SMI, Rezultadu monitorizasaun Provedoria ba Diretu humanu no Justisa – PDHJ simu keixa ka identifika maioria iregularidade ne’ebé mosu durante eleisaun antesipada kona-ba Funsionáriu Públiku – FP uza patrimoniu estadu hodi tuir kampaña eleitorál to’o periodu eleisaun nian.
“Monitor PDHJ nian iha terenu ne’e la serbisu mesak. Ami serbisu hamutuk ho monitor sira husi CNE rasik, ami monitor la’o hamutuk i identifikasaun irregularidade barak liliu iha envolvimentu funsionarios publikus sira utilizasaun patrimoniu estadu”, Dehan Provedor Silveiro Pinto ba Jornalista sira iha CNE, Kaikoli, Kinta (17/05).
Silveiro hatutan husi rezultadu monitorizasaun PDHJ la’os deit identifika funsionáriu públiku uza patrimoniu estadu maibe mós simu keixa husi partidu polítiku no koligasaun partidaria sira kona-ba funsionáriu públiku ne’ebé laiha lisensa hodi tuir kampaña eleitorál.
“Iha mós keixa balun mai husi partidu no koligasaun maibe tuir lolos keixa ne’e partidu no koligasaun sira nia keixa ne’e direita (ba) mai iha CNE, ami tenke rejista maske ne’e kuñesimentu ba funsionarius publikus ne’ebé mak laiha lisensa partisipa iha kampanha eleitorál liu 20 dias la hetan lisensa”, nia dehan.
Nia mós relata katak durante periodu eleisaun antesipada PDHJ simu keixa maizumenus hamutuk 8 husi koligasaun Aliansa Maioria ba Progresu – AMP kona-ba krime eleitorál ne’ebé akontese iha munisipiu.
“Ami simu ne’e husi koligasaun AMP por volta de 6,7,8, keixa, keixa hirak ne’e refere kona-ba distribuisaun sasan sira, balun liga krime eleitorál balun ne’ebé mak akontese iha laga wainhira AMP ba kampanña iha Laga”, tenik Silveiro.
Atu taka, Silveiro arumenta katak PDHJ sei hato’o relatóriu rezultadu monitorizasaun eleisaun antesipada ba Parlamentu Nasionál – PN no VIII Governu konstitusionál. (Editor, Mateus Barros).
