Dili-SMI, Ministru Agrikultor no Peska - MAP, Estanislau Aleixo da Silva, rekomenda ba Governu foun atu kontinua programa ne’ebé VII Governu establese ona durante fulan ualu (8) liu-liu kona-ba agrikultor no peska nian.
“Hau kontente tamba konsege hala’o servisu barak liu-liu iha areas florestas halo rebelizasaun ba kafe kuda ai kameli ho aihoris balun ne’ebe ho valores komersiál bot tebes, hein katak governu foun mai sei halo investimentu boot para hodi hadi’a diak liu tan,’’ katak Estanislau hafoin selebra misa 20 de Maiu, iha Igreja Motael, Sexta, (18/05).
Aleixo mós relata kona-ba MAP nia susesu durante fulan ualu (8) nia laran ne’ebé konsege establese tanki ikan iha munisipiu 13 hodi fasilita komunidade asesu ikan no hadi’a problema nutrisaun iha rai-laran.
‘’Kona ba peskas, hau kontenti tebes ami hetan susesu bot tamba konsege estabelece tanki ikan nian iha munisipu hotu-hotu, ohin loron ita nia populasaun iha foho bele hetan asesu ba ikan. Ida ne’e kontribui maka’as ba iha nutrisaun para ita bele hadi’a problema nutrisaun ne’ebe ke boot tebes iha rai laran”, tenik Estanislau.
Nia hatutan, parte agrikultura no pekúaria MAP mós konsege hadi’a irigasaun sira ne’ebé at hodi utiliza fila fali no halo vasinasaun ho kuantidade boot inklui fó asistensia teknika ba populasaun kona-ba hakiak manu.
Nia mós esplika MAP ninia dezafiu durante fulan Ualu mak kestaun limitasaun orsamentu labele ezekuta diak liu-liu atu intensifika programa no atividade sira kona-ba agrikula nian, hanesan labele halo rehabilitasaun ba irigasaun iha munispiu Manatuto no Maliana.
Nune’e mós, nia aumenta katak MAP mós halo koperasaun internasionál hodi establese regra tradisionál sira hanesan tara-bandu iha Atauro no fatin seluk hodi labele kaer ikan iha area protezidu sira. (Editor, Lariwa).
