Dili-SMI, Prezidente Comissão Nacional Eleicões – CNE, Alcino Barris hateten, Partidu Polítiku – ParPoli no Koligasaun Partidaria – KolPar iha diretu durante horas 48 nia laran hodi halo rekursu karik la satifas ho rezultadu apuramentu finál apuramentu nasionál eleisaun antesipada parlamentar 2018.
“Comissão nacionál de eleicões hahu halo publikasaun provizoriu ba rezultadu eleisaun antisipada parlamentar 12 de maiu 2018, partidus politikus no koligasaun partidaria sira iha direitu hodi halo rekursu durante tempu 48 horas”, dehan Alcino Barris, iha Edifisiu CNE, Kinta, (17/05).
Alcino mós informa katak CNE sei haruka kopia rezultadu ba STAE, partidu polítiku no koligasaun partidaria inklui orgaun komunikasaun sosiál iha Timor-Leste.
Tuir dadus taxa partisipasaun eleitorál ba eleisaun antesipada parlamentar hamutuk 80,98% ho husi totál votante mane hamutuk 308.844 (48,63%) no votante feto hamutuk 326.272 (51,37%).
No, presentazen votu tuir kada partidu polítiku no koligasaun partidaria mak hanesan PEP ho votu hamutuk 5.060 (0,80%, PD ho votu 50.370 (8,1%), PR ho votu 4.125 (0,7%), FRETILIN ho votu 213.324 (34,2%), MSD ho votu 3.188 (0,50%), MDN ho votu 4.494 (0,7%), FDD ho votu 34.301 (5,5%) no AMP ho votu 309.633 (49,6).
Rezultadu finál apuramentu nasionál kona-ba eleisaun antesipada parlamentar ho kompozisaun kadeira mak AMP ho kadeira 34, FRETILIN ho kadeira 23, PD kadeira 5 no FFD kadeira 3 iha Parlamentu Nasionál. (Editor, Lariwa).