Dili-SMI, Prezidente Tribunál Rekursu – PTR, Deolindo dos Santos hateten Tribunál Rekursu sei proklama rezultadu eleisaun antesipada ba parlamentar tinan 2018 iha loron 28 fulan Maiu hafoin orgaun eleitorál CNE entrega ba instituisaun ne’ebé nia lidera.
“Tribunál Rekursu sei proklama sai rezultadu eleisaun ne’ebé mak ita hala’o iha loron 12 de Maiu 2018. Tribunál Rekursu sei halo iha masimu ate 28 fulan ida ne’e nia laran”, katak Deolindo hafoin partisipa misa agradesimentu ba 20 Maiu, iha Igreja Motael, Sesta, (18/05)
Deolindo esplika katak Tribunál Rekursu sei foti dezisaun hodi proklma rezultadu eleisaun antesipada hafoin liu prazu oras 72 ne’ebé sura husi CNE entrega rezultadu apuramentu nasionál ba Tribunál Rekursu.
PTR ne’e mós afirma katak prosesu apuramentu nasionál CNE finaliza ona no durante oras 48 nia laran fó biban interesadu sira hodi halo reklamasaun antes CNE entrega ba parte Tribunál Rekursu atu proklama.
“Horseik (Kinta, 17/05) apuramentu nasionál hotu iha CNE , entaun ohin sira fixa iha sede CNE i sira haruka mos kopia ba partidu sira ho STAE. Kuandu prazu ne’e liu tiha 48 oras sira sei haruka ba Tribunál Rekursu. Mais tarde segunda –feira sira remete aktus sira ne’e hotu ba Tribunál Rekursu”, tenik nia.(Editor, Lariwa).
