Dili-SMI, Komandu Polisia Nasional Timor Leste – PNTL munisipiu Dili kaptura no detein ona autor na’in tolu ne’e deskonfia baku membru F-FDTL Komponente Naval iha Igreja Motael nia oin, iha loron 20 Maiu foin lalais ne’e.
Segunda Komadante PNTL munisipiu Dili, Superentidente Asistente, Euclides Belo hateten kapturasaun autor na’in tolu husi seksaun patrollamentu eskuadra polisia Vera Cruz bázea ba informasaun husi komunidade kona-ba autor hirak ne’e.
“Ami hetan informsaun husi komunidade haruka kedas seksaun patrullamentu Vera Cruz nian buka kedas suspeitu no kaptura kedas tamba ne’e mak suspeitu agora detein iha sela polisia komandu PNTL munisipiu dili nian”, dehan Euclides Belo ba Jornalista sira iha nia kna’ar fatin Kaikoli, Segunda (21/05).
Nia informa katak dadaun ne’e autor na’in tolu ne’e sei detein hela iha sela polisia munisipiu Dili hodi kompleta prosesu investigasaun ne’ebé lidera husi polisia investigasaun kriminál antes notifika ba tribunál.
Wainhira husu kona-ba motivu husi akontesementu ne’e, Euclides esplika katak seidauk hatene loloos motivu husi akontesement refere tanba sei iha prosesu investigasaun.
“Motivu husi kazu ne’e dadaun iha hela prosesu under line”, dehan nia.
Tuir informasaun ne’ebé SMI asesu katak membru F-FDTL ne’ebé sai vitima husi akontesementu dadaun hetan hela tratamentu intensive iha Hospitál Nasionál Guidu Valadares – HNGV Dili, tanba indetifika grave.
To’o notisia ne’e públika SMI seidauk halo konfirmasaun direta ba HNGV kona-ba oinsa progresu no mudansa saude husi membru F-FDTL ne’e rasik. (Editor, Lariwa).
