Dili-SMI, Partidu FRETILIN nu’udar segundu mais votadu iha eleisaun antesipada parlamentar hato’o rekursu ba Tribunál Rekursu tanba deskofina mosu iregularidade barak durante periodu eleisaun hanesan money politics, intimidasaun, krime eleitorál no manipulasaun ba númeru votus.
Sekretáriu Jerál partidu FRETILIN ne’ebé atuál nu’udar mós Primeiru Ministru Mari Bin Amude Alkatiri katak partidu iha evidensia kona-ba fraude sira ne’ebé kuaze akontese iha munisipiu sira, tanba ne’e deside hato’o rekursu ka reklama ba Tribunál Rekursu hodi tau atensaun.
“Se laiha iregularidade ami labele apresenta, la’os iha RAEOA deit maibé iha fatin hotu-hotu, FRETILI deskonfia iha money politics, intimidasaun, ne’e krime eleitorais agora iregularidade prosesuais mós iha hotu, karik iha manipulasaun aumenta numeru votus husik tribunál mak deside”, dehan Mari hafoin partisipa seremonia loron 20 Maiu iha Palasiu Governu, Domingu, (20/05).
Atual Primeiru Ministru ne’e argumenta katak sempre simu no kumpri desizaun tribunál kona-ba rezultadu husi eleisaun antesipada ne’e rasik. Tanba, nia hatutan FRETILIN respeita lei no konstituisaun ne’ebé vigor iha Timor-leste.
Antes ne’e, Prezidente Komisaun Masionál ba Eleisaun (Sigla Portguês CNE), Alcino de Araújo Barris wainhira hala’o konfrensia imprensa iha Sabdu, (19/05) rekuiñese katak partidu FRETILIN hatama duni rekursu hodi loke fila fali urnas atu halo rekontazen fila fali akta ne’ebé iha urnas laran.
To’o notisia ne’e públika SMI seidauk halo klarifikasaun ho Tribunál Rekursu relasiona ho rekursu ne’ebé partidu FRETILIN hatama. (Edit, Mateus Barros).
