Dili-SMI, Polisia Nasional Timor Leste – PNTL sempre preparadu hodi kontrola no prevene kona-ba isu terorista tama ona iha teritoriu Timor-Leste ne’ebé dadaun ne’e sai perokupasaun públiku iha mídia sosiál.
Ministru Defeza no Seguransa – MDS, Jose Agostinho Somotxo esplika katak polisia espesiálista anti terorista no kontra terorizmu dadaun ne’e halo hela serbisu maka’as iha terenu hodi verifika informasaun no rumores ne’ebé dadaun espalla iha públiku.
“Ita nia polísia ne’ebé treinu sira mós treinu duni ba anti terorizmu kontra terorista sira hala’o hela serbisu. Kuandu ita haruka ita nia polisia ne’e ba buat mamuk ida laiha realidade, ba hau atu greve situasaun sira ne’e hotu ita nia agentes de informasoes ita nia polisia sira la’o hela”, dehan Jose Agustinho Sequeira “Somotxo” ba Jornalista sira hafoin remata enkontru ho Prezidente da Repúblika, Francisco Guteres “Lú Olo, iha Palasiu Presidensial Aitarak-Laran, Tersa, (22/05) foin lalais ne’e.
Somotxo esplika katak nia rasik sente preokupa maibe kontaktu ona ba embasador Indonezia iha Timor-Leste atu tau atensaun tanba rumores kona-ba terorista ne’e atu kria instabilidade polítika no seguransa entre nasaun rua nian.
“Hau hateten ona ba embaisador ne’e hanesan uluk ami iha funu dehan manobra de diversaun diverse ita nia atensaun ba fali fatin seluk para bele ataka iha fatin seluk, ne’e mak hau preokupa. Hau mós fó hatene ona ba embasador para atensaun, ida ne’e hanesan instabilidade politika ho instabilidade seguransa ninian”, dehan nia.
Ministru Somotxo mós bolu atensaun ba públiku atu labele paniku tanba instituisaun seguransa no defeza halo hela serbisu hodi evita no kontrola terorista tama mai teritoriu Timor-Leste. (Editor, Mateus Barros).
