Dili-SMI, Komandante Jerál Falintil Forsa Defeza Timor Leste - F-FDTL, Maijor Jenerál Lere Anan Timur, afirma katak nia rasik sei hamrik hodi kontra Kay Rala Xanana Gusmão no Taur Matan Ruak wainhira sira iha hanoin atu estraga nasaun, maibe nia fiar katak lider na’in rua ne’e hadomi povu no nasaun ida ne’e.
“Hau mak politiku karik hau dehan hanesan ne’e, hau nia maun Xanana koalia saida tuir deit, nia sei moris haruka ba hamutuk fali Indonesia entaun ne’e ita kontra malu fali ona mais atu halo saida iha timor hau tuir deit maun. Mais atu estraga nasaun ne’e ami rua kontra malu mais hau nunka fiar katak ita nia maun bo’ot na’in rua Xanana no Taur ne’e hanoin at ba nasaun ne’e laiha”, dehan Maijor Jeneral Lere Anan Timor ba Jornalista sira hafoin remata enkontru ho Prezidente Repúblika iha Palasiu Presidensial Aitarak-Laran, Kuarta, (23/05).
Jenerál fitun rua ne’e afirma maske pasadu nu’udar membru Komite sentrál fretilin maibe dadaun ne’e nu’udar komandante ba forsa armada sei la sadere ba partidu politiku ruma, nafatin hamrik neutru hodi garante seguransa ba povu no nasaun.
“Ami militar ne’e neutru ami la sadere ba partidu, hanesan hau jenerál hau la’os kualkuer ema, hau ne’e uluk fretilin, komite sentral da fretilin mais hau fretilin karik ita golpe kleur tiha ona mais interese nasaun ne’e importante liu halo oinsa ita nia povu ne’e bele moris diak”, tenik Lere Anan Timur.
Eis komandante falintil rejiaun ponta leste ne’e husu povu tomak atu respeitu no valoriza lider nasionál hanesan Taur Matan Ruak, Ramos Horta, Mari Alkatiri no Xanana Gusmão, labele halo diskriminasaun hasoru lider hirak ne’e. (Editor, Mateus Barros).
