Dili-SMI, Primeira Dama, Cidalia Nobre Guterres hateten katak familia hanesan inan no aman tenke iha responsabilidade ne’ebé masimu ba oan sira hodi eduka no sai matadalan importante ba sira nia moris iha futuru.
Tanba, tuir Primeira Dama katak labarik no oan sira wainhira sai susesu iha sira nia moris presiza hetan atensaun ne’ebé masimu husi inan no aman sira.
Ho nune’e, Cidalia apelu ba povu Timor-Leste tomak atu kuidadu no tane dignidade familia liu husi atividade hirak ne’ebé ho responsabilidade tuir doutrina maromak nian.
“Hau apela ba familia tomak mai ita agradese ba aman maromak tamba familia nu’udar bensa, ita hotu tane ita nia familia, kuidadu nafatin familia ho responsabilidade”, dehan Cidalia hafoin partisipa konfrensia internasional Familia Kristaun, iha Salaun Katedgral Villa-Verde, Kinta, (24/05).
Departementu Familia Deocese DILI, Pe. Jose Tacein hateten responsabilidade inan aman importante hodi fó susesu ba oan sira nia uma kain.
“Inan aman iha uma laran atu hamenus dezafiu husi mundu ne’e, presiza akompañamentu husi inan aman”, dehan Pe. Jose Tacein.
Iha biban hanesan, Amalia Tilman hateten importante ba familia atu sai susesu mak presiza moris tuir dotrina igreja no ukun fuan maromak nian.
Tanba moris nu’udar familia sempre iha dezafiu oi-oin ne’ebé mosu, atu bele infrenta dezafiu hirak ne’e presiza ho maromak ninia tulun. (Editor, Mateus Barros).
