Dili-SMI, Fundadora Sentru Quesadhip Ruak, Isabel Ferreira entrega sertifikadu formasaun báziku komputador ba joventude hamutuk 21 ne’ebé durante ne’e tuir formasaun iha sentru refere.
“Ohin halo seremonia entrega sertifikadu ba joven sira ho totál 21 ne’ebé mak mai tuir formasaun komputador iha sentru Quesadhip Ruak’’, dehan Isabel Ferreira hafoin entrega sertifikadu iha Taibesi-Dili, Kinta, (24/05).
Isabel mós esplika katak Sentru Quesadhip sei hetan dezafiu barak intermu ekipamentu no fasilidade formasaun nian hanesan komputador no formador maibe sei halo esforsu hodi kompleta atu nune’e bele fasilita formasaun ho kualidade.
“Iha dezafiu barak falta de komputadores i mos treinador sira, i hanoin buat ne’ebé mak iha ne’e agora ita sei bele ajuda halo lai, ba oin sei iha posibildade para bele aumenta komputador, maibe hau lakohi halo promesa,’’ dehan nia.
Eis Primeira Dama ne’e mós informa katak iha futuru Sentru Quesadhip sei fó oportunidade ba timoroan ne’ebé hakarak atu buka esperensia ka magan hodi nune’e bele aumenta kuiñesementu iha sentru refere.
David Patricio Belo nu’udar formandu apresia no fó agradese wain ba Sentru Quesadhip ne’ebé fó ona oprtunidade no kria kondisaun ba joventude timoroan hodi sira hodi aumenta kapasidade kona-ba komputador nian.
“Agradese tebes tamba bele promove ami juventude sira ne’ebé mak hanesan kria kondisaun ba ami atu bele kapasita ami ninia abilidade ho skill, ho kursus komputador ne’ebé mak ami hetan iha sentru ne’e”, dehan nia ho kontente. (Editor, Mateus Barros).
