Dili-SMI, Komandante Jerál PNTL, Komisariu Julio Hornay informa katak instituisaun Polisia Nasionál Timor Leste – PNTL identifika ona autor na’in 3 ne’ebé baku labarik sira husi Oe-cusse foin lalais ne’e iha Tasitolu foin lalais ne’e.
“Kona-ba kazus balun ne’ebé mak foin dadauk ita rona dehan katak labarik na’in haat (4) ema baku iha São Miguel, ida nee suspeitu identifikadu, kazu registador sira ba kedas iha ministeriu publiku, agora ita nia investigasaun Dili sei hein hela mandadu de kapturasaun para atu bele ita kaptura suspeitu ne’e”, dehan Komisariu Julio Hornay ba jornalista sira hafoin remata enkotru ho Prezidente Repúblika iha Palasiu Presidensial Aitarak-Laran, 24/05).
Julio Hornay afirma katak PNTL liu husi Servisu Investigasaun Kriminal – SIK hein deit prosesu no mandadu kapturasaun husi Ministeriu Públiku hodi ba kaptura autor na’in tolu (3) ne’ebé dadaun ne’e identifika ona autor na’in tolu ne’e.
Nia hatutan hodi husu ba públiku liu-liu joven sira atu hakribi violensia no hametin unidade atu kontribui ba dezenvolvimentu nasionál. Tanba wainhira halo krime mak sei hetan sansaun husi aktu krime ne’ebé nia komete.
“Hau husu ba maluk timor oan sira, nu’udar timor oan ita diak liu ses an husi aktus krimi ida ne’e, hodi nunee ita bele moris hakmatek hala’o ita nia atividade lor-loron ba sustenta ita nia moris duke ita envolve ita nia an ba iha aktus krimi ne’ebé mak prejudika ita nia future”, tenik nia.
Lider masimu instituisaun PNTL ne’e sadik timoroan hotu hodi kontinua mantein paz no estabilidade iha rai-laran hodi nune’e bele moris livre hodi goza independensia ida ne’e.(Editor, Mateus Barros).
