Dili-SMI, Xefe gabineti, Xefe Estadu Maior Forsa Armada, Tenente Koronel Haksolok, senti kontente no fó agredese ba VII Governu konstitusional tanba durante tinan 18 nia laran, foin mak instituisaun militar bele iha aviaun patrollamentu.
“Prezenti furak ne’ebé VII governu konstitusional fó ba instituisaun militar, kontenti tebes instituisaun hari’i ona tinan 18 nia laran ne’ebé primeira vez governu atraves ba kompaña Aero Dili oferese prezente boot ba instituisaun militar, kontenti tebes’’, dehan Tenente Haksolok iha Aero-Portu Nicolau Lobato, Sexta, (25/05) foin lalais ne’e.
Tenente Haksolok afirma katak apoiu aviaun husi Governu liu husi Áero Dili ne’e seidauk sufisiente hodi bele halo patrollamentu ne’ebé efisiente tanba area operasaun ka patrollamentu ne’ebé luan. Ho nune’e, komandante ne’e husu ba Governu foun (VIII Governu) atu suporta diak liu tan instituisaun militar hodi bele asegura soberania nasionál.
“Área operasaun kuaze timor laran tomak, tmba aviaun ne’e ita nian, nasaun ne’e ita nian. Ne’e seidauk bele sufisiente tamba ida ne’e foin primeira vez ne’ebé signifika katak ida ne’e foin atu kria komponente ida Aero ninian nebe ida ne’e seidauk sufisienti, ba governu foun ne’ebé mai oinsa suporta instituisaun militar hodi asegura estabilidade”, dehan nia.
Ministru Defeza Seguransa Jose Agustinho Sequeira ’’Somotxo’’ mós armenta katak soberani tasi-timor ne’ebé luan sai dezafiu ida ba patrollamentu militar ho aviaun ne’ebé oferese husi Governu.
Maibe, nia hatutan nu’udar pasu primeiru oinsa bele halo lansamentu primeiru pedra kona-ba komponente Áero nian.
“Fronteira maritima ne’ebé boot liu ita nia rai maran, ita la iha kondisaun militares para asegura ita nia fronteira maritime, ida ne’e difisil tebes para atu koalia. Ida ne’e hanesan primeiru pasu ba komponente Áero, mesmu hau sai mos, hau hanesan bain-bain ita koalia dehan lansamentu primeira pedra”, dehan Somotxo.
Iha parte seluk, Diretúr Áero, Lourenco de Oliveira ne’ebé oferese aviaun ba instituisaun F-FDTL liu husi VII Governu ne’e esplika katak la’os tanba nia osan barak hodi sosa aviaun patrollamentu, maibe objetivu atu ajuda F-FDTL hodi halo seguransa ba fronteira maritima Timor-Leste nian.
“Hau oferese aviaun ne’e laos hau atu hatudu dehan hau osan iha, mais tamba hau haree katak kuandu ita nia maun boot Xanana asina ona Maritima Fronteira ita tenkiser iha netik buat ida para patrolla, haree ita nia fronteira”, dehan Lourenco. (Editor, Mateus Barros).
