Dili-SMI, Eis Primeira Dama, Isabel Ferreira Ruak, fó atensaun ba Kay Rala Xanana Gusmão no Taur Matan Ruak atu kuidadu hodi labele nomeia ema sira ne’ebé kazu iha instituisaun Komisaun Anti Korupsaun - KAK hodi tama iha estrutura Governu AMP nian.
“Hau hanoin membru governu ne’ebé iha ona lista halo iha kazu diak liu lalika. Lider AMP nian Xanana, Taur no Naimori sira tenki hatene, tamba dala barak sira laiha informasaun ida ne’e sira mós nomeia ema ne’ebé iha hela sala ba fali tur iha governu”, dehan Isabel Ferreira, iha Casa Cidadania, Kolmera, Sexta, (01/06).
Isabel mós haktuir katak durante ne’e durante ne’e sosiadade sivil preokupa tebes no sujere atu lider AMP labele involve pesoál sira ne’ebé komete ona erru atu ama fali iha estrutura governu nian tanba bele estraga imajen governasaun AMP nian.
Tuir Isabel katak nasaun Timor-Leste ne’ebé ho populasaun hamutuk 1,2 millaun lapresiza Governu halo estrutura ne’ebé boot. Maibe importante mak oinsa koloka ema ne’ebé iha kompetente ho kapasidade multifunsaun hodi responde ba nesesidae povu nian.
“Tuir hau nia opiniaun pesoál ne’e timor ida populasaun hamutuk 1,2 millaun, la presiza estrutura ida bo’ot, presiza ema ne’ebe kompetente para bele halo multifunsaun para bele responde nesesidade povu nian, laos razaun halo estrutura bo’ot para responde nesesidade povu nian”, dehan nia. (Editor, Mateus Barros).
