Dili-SMI, Sekretáriu Jerál partidu FRETILIN, Mari Bin Amude Alkatiri kestiona kapasidade Kay Rala Xanana Gusmão - XG no Taur Matan Ruak - TMR ne’ebé to’o ohin loron seidauk konsege forma VIII Governu konstitusionál.
“VIII governu nunka mais mai, uluk hau demora sira dehan hau laiha kapasidade, ne’e duni hau hakarak lalais uitoan tamba sira iha kapasidade”, dehan Alkatiri ba jornalista sira iha Palasiu Prezidensiál, Aitarak-Laran, Segunda, (04/06).
Atúal Primeiru Ministru – PM ne’e preokupa ho formasaun VIII Governu ne’ebé tarde sei fó impaktu ba atividade ekonomia no polítika iha rai-laran.
Nune’e mós, nia hatutan formasaun Governu foun fó implikasaun ba povu nia moris.
“Hau triste tamba ne’e fó impaktu ba ekonómia, fó impaktu ba polítika, fó impaktu ba povu nia vida rasik”, dehan Mari.
Mari mós informa katak partidu FRETILIN deside ona atu sai opozisaun iha Parlamentu Nasionál ba kinta lejizlatura nian.
Maibe, nia klarifika katak sai opozisaun la’os atu hatun governu maibe sai opozisaun atu ajuda VIII Governu la’o susesu iha futuru.
“Fretilin prontu atu halo opozisaun. Klaru katak FRETILIN ba opozisaun, opozisaun la’os atu ba hatun governu, maibé opozisaun atu bele ajuda governu atu la’o diak liu tan”, tenik Alkatiri. (Editor, Mateus Barros).
