Dili-SMI, Parlamentu Nasionál - PN ofisiálmente lansa ona meus komunikasaun sosiál hanesan rádiu ho frekuiensia FM 92,9 Mz no portál ofisiál foun www.parlamento.tl hodi fasilita informasaun ba públiku kona-ba atividade ka serbisu Parlamentu nian.
Prezidente PN Aniceto Guterres esplika katak planu harii rádiu parlamentu ne’e hahu inisia husi III lejizlatura iha tinan 2016 maibe foin mak bele halo lansamentu tanba prosesu sosa ekipamentu sira no sistema aprovizionamentu ne’ebé tarde.
“Planu Estratéjiku parlamentu nasionál nian, prepara iha tinan 2016, maibe nia prosesu aprovizionamentu hola ekipamentu sira ne’e kleur liu, tamba problema iha prosessu aprovicionamentu”, dehan Aniceto Guterres, iha Uma Fukun PN, Kuarta, (06/06).
Aniceto informa katak meus komunikasaun sosiál hanesan rádiu parlamentu ne’e importante tebes hodi fasilita transmisaun direta atividade plenária PN ba públiku.
Nia hatutan, desde primeiru lejislasaun iha ona hanoin katak PN presiza iha meus komnunikasaun ketak hanesan rádiu no televizaun hodi fasilita transmisaun direta ba atividade plenária.
Tuir espetativa sei aumenta frekuiensia rádiu PN iha futuru hodi nune’e bele kobre teritoriu timor laran tomak. (Editor, Mateus Barros).