Dili-SMI, Komandante Jerál Falintil Forsa Defeza Timor Leste - F-FDTL, Maijor Jenerál Lere Anan Timor informa sei retira militár ne’ebé koloka iha Postu Administrativu Uatulari, Munisipíu Vikeke hodi fó seguransa ba Eleisaun Atensipada foin lalais ne’e.
“Forsa rua (F-FDTL – PNTL) sei hala’o servisu hela iha ne’eba, maibé iha tempu badak sei retira, atu nune’e povu bele fó fiar ba polísia hodi hala’o servisu mesak”, dehan Lere ba jornalista sira hafoin remata enkontru ho Prezidente Repúblika, iha Palasiu Prezidensiál Aitarak-Laran, Kuarta, (06/06).
Jenerál fitun rua ne’e argumenta to’o agora seidauk dada fali militár ne’ebé destaka iha Postu Administrativu Uatulari tanba kestaun seguransa, la’os atu hadau serbisu instituisaun Polisia Nasionál Timor Leste – PNTL nian.
Bainhira jornalista sira husu destakamentu ne’e hanesan militár halo fali serbisu polísia nian, Lere klarifika: “Governu bele depozita konfiansa totál ba PNTL atu la’o mesak, halo mesak nia servisu ne’e, mas ita nu’udar Timor oan responsabilidade hotu-hotu nian, ita ajuda malu, ajuda malu la signifika katak ba halo fali ema nia servisu”.
Eis komandante Falintil ne’e fiar katak povu Uatulari sei kria ambiente paz no hakmatek iha sira nian rai hodi kontribui ba prosesu dezenvolvimentu iha rai-laran. (Editor, Mateus Barros)