Dili-SMI, Prokurador Jerál Repúblika – PJR, José da Costa Ximenes kondena relatóriu Provedoria Diretus Humanus no Justisa – PDHJ kona-ba rezultadu monitorizasaun ne’ebé identifika funsionáriu Ministériu Públiku - MP involve iha kampaña eleitorál durante periodu Eleisaun Antesipada foin lalais ne’e falsu no laloos.
PJR rasik haruka ona karta protesta ofisiál hasoru instituisaun provedoria kona-ba rezultadu monitorizasaun ne’ebé providoria deklara iha loron 18 fulan Abril fulan kotuk liu ba.
“Ami halo ona protesta formál ida ba PDHJ, relativamente ho PDHJ nia deklarasaun ne’ebé halo iha loron 18 fulan Abril iha instalasaun Provedoria dos Direitos Humanos e Justisa. Hau lakohi koalia kona-ba MSS No Obras Públika nian, mais laloos katak funsionáriu Ministériu Públiku nian partisipa iha kampaña eleitorál, deklarasaun ne’ebé provedor halo ne’e la loos”, dehan PJR José Ximenes hafoin remata enkontru ho PR iha Palasiu Prezidensiál Aitarak-Laran, Kuarta, (06/06).
José klarifika katak to’o ohin nia parte seidauk simu relatóriu kona-ba funsionáriu MP no funsionáriu públiku seluk ne’ebé identifika involve direta iha kampana eleitorál eleisaun anteipada nian.
Liu husi biban ne’e, PJR mós relata katak MP rasik rejistu kazu hamutuk 14 kona-ba krime eleitorál ne’ebé akontese iha Munisipíu tolu (3) hanesan munisipiu Dili, munispíu Baucau no Rejiaun Espesiál Oe-Cusse.
“Hahu iha loron 10 Fulan Abril Ministériu Públiku rejista kazu ho tipu krime eleitorál ho totál 14 prosesu, kazu 11 akontese iha Dili, rejista iha Prokuradoria de Dili, kazu 2 rejista iha munisipiu Baucau, no kazu 1 rejista iha Oe-cusse”, dehan José Ximenes.
Nia hatuan katak husi kazu krime eleitorál ne’ebé MP rejista dadaun halo hela prosesu investigasaun, no kazu krime eleitorál ne’ebé akontese iha kampaña eleitorál tinan 2017 balun tama ona faze akuzasaun nian.
Iha fulan Abril PDHJ rasik fó sai relatoriu monitorizasaun ne’ebé mensiona katak funsionáriu MP no funsionáriu públiku balun uza patrimoniu estadu hodi tuir kampaña eleitorál. (Editor, Lariwa).
