Dili-SMI, Prosesu formasaun VIII Governu Konstitusionál ne’ebé atraza to’o ohin loron, sai báze ba argumentu entre lider partidu FRETILIN no koligasaun AMP hodi sadik malu no duun malu kona-ba kapasidade atu forma Governasaun foun.
Prezidente Juridisaun AMP, Arão Noe kontra deklarasaun Sekretáriu Jerál partidu FRETILIN, Mari Alkatiri ne’ebé kestiona prosesu formasaun VIII Governu atraza tanba lideransa AMP laiha kapasidade.
‘’Se PM hakrak lalais atu forma governu kontaktu mai Prezidente Parlamentu para haruka ajenda ba plenária kinta sesaun nian. Se ajenda ne’e la la’o entaun ami mós labele halo buat ida tamba ne’e mak labele fo sala ba AMP katak AMP mak forma governu atraza ida ne’e i ami la simu i la konkorda’’, dehan Arão Noe, iha Parlamentu Nasionál, Kinta, (07/06).
Arão Noe argumenta katak prosesu formasaun VIII tarde tanba atúal Primeiru Ministru nomós Sekretáriu Jerál partidu FRETILIN, Mari Alkatiri rasik laiha kontaktu ba Prezidente Parlamentu Nasionál hodi konvoka plenária V lejizlatura nian.
Nia afirma liu tan katak formasaun Governu foun ne’e la’os depende ba partidu ne’ebé mak manan iha eleisaun maibe depende ba Prezidente Parlamentu sesante nia konvokatoriu primeiru sesaun plenária V lejizlatura hodi fó dalan ba formasaun Governu foun.
Antes ne’e, Sekretáriu Jerál partidu FRETILIN, Mari Bin Amude Alkatiri kestiona kapasidade Kay Rala Xanana Gusmão - XG no Taur Matan Ruak - TMR ne’ebé to’o ohin loron seidauk konsege forma VIII Governu konstitusionál.
“VIII governu nunka mais mai, uluk hau demora sira dehan hau laiha kapasidade, ne’e duni hau hakarak lalais uitoan tamba sira iha kapasidade”, dehan Alkatiri ba jornalista sira iha Palasiu Prezidensiál, Aitarak-Laran, Segunda, (04/06).
Mari Alkatiri kestiona formasaun VIII Governu ne’ebé tarde ho razaun katak bele fó impaktu ba atividade ekonomia no polítika iha rai-laran ne’ebé bele fó impaktu ba povu nia moris. (Editor, Lariwa).
