Díli-SMI: Membru instituisaun FALINTIL-Forsa Defeza Timor Leste – F-FDTL hosi unidade Polísia Milítar – PM hamutuk ema na’in 46 sei tuir formasaun durante fulan tolu iha area defeza no seguransa bázea ba akordu koperasaun bilateral entre Timor-Leste no Brázil.
“Membru unidade Polísia Milítar -PM hamutuk na’in 46 sei partisipa formasaun 2020 ba Maubere V no formasaun refere koperasaun bilateral entre Timor Leste ho Brazil iha Area defeza no seguransa nian”, dehan Komandante PM, Maijór, Abel da Costa Xavier “Niki” ba jornalista sira iha edifisiu PM, Kintal-Boot, Díli, Segunda, (14/07).
Komandante PM, Maijór, Abel, esplika, tuir loloos formasaun milítar ne’e akontese ona iha insíu tinan ida ne’e, maibe tanba kestaun COVID-19 ne’ebé labele realiza formasaun refere.
Nune’e, dadaun ne’e mak atu kontinua fila fali formasaun unidade polísia milítar ba maubere V ne’ebé sei foka ba area importante tolu mak: area prepara inspetór ba PM, kontrola milítar, investigasaun, agregasaun no oinsa halo levantamentu dadus hodi nune’e bele haforsa serbisu unidade PM nian.
“Durante nee formasaun unidade polisia Militar ba Maubere V la la'o tamba situasaun mundial infrenta COVID-19. Formasaun refere sei partisipa hosi membru unidade PM hamutuk 46 no durasaun formasaun fulan Tolu no sei foku liu-ba iha area prepara inspetores ba PM, kontrola Milítar, investigasaun ,Agregasaun no oinsa levanta dadus”, tenik nia.
Iha biban refere, Komandante Jerál F-FDTL, Maijór Jenerál, Lere Anan Timur, ne’ebé halo abertura formasaun PM maubere V husu ba partisipante sira atu disiplina no hatudu responsabilidade durante formasaun.
Nune’e bele hetan esperensia no matenek hodi serbi ho profísional iha seitór defeza no seguransa hodi garante paz no estabilidade iha rai-laran.
“Ba membru unidade Polisia Militar nian, atu mantein disiplina no responsabilidade atu hatudu nafatin servisu profesionalizmu hodi kumpri Nafatin regras iha area defeza no seguransa nian hodi garante paz no estabilidade iha Timor Leste”, dehan Lere.
Komandante Fitun rua ne’e, fo korajen membru unidade PM atu hatudu matenek no profísionalizmu durante formasaun liu-hosi ambitu koperasaun defeza no seguransa refere.
“Iha esperansa boot ba PM, Timor mos bele no sei servisu hamutuk ho Instituisaun seluk hodi kontribui ba Instituisaun Defeza no seguransa nian”, katak nia. (Editór, Guido Santos).
