Iliomar-SMI: Eskola Baziku Sentrál - EBC (sigla Portugués) iha Sub Administrativu Iliomar Villa dadaun ne’e hetan ameasa hosi erosaun ka rai-halai ne’ebé dezde tinan 2012 maibe to’o ohin loron seidauk iha atensaun hosi parte edukasaun munisípiu Lautém nian.
Pontu fokál Organizasaun Naun Govermental – ONG Luta Hamutuk, Jaime Jeronimo, esplika, iha tinan 2012 wainhira mosu dezastre naturais ladun fó ameasa ne’ebé perigu ba EBC refere hanesan dadaun ne’e.
“Erosaun hahu hosi tinan 2012, momentu ne'eba sei dook, maibe ladaun tau atensaun hosi parte kompetente nian. No, ohin Hau Mai observa fila fali erosaun rai monu ne'e kontinua besik loos ona eskola refere ho sentimu de’it ona, nune'e iha tempu ida ne'e sei fó ameasa boot ba EBC Iliomar ne'e”,Jaime Jeronimo, ba SMI, iha Nia rezidensia Iliomar, Kuarta, (15/07).
Jaime esplika, EBC Iliomar ne’ebé lokaliza iha area Osohira ne’e to’o ohin loron seidauk hetan atensaun hosi parte edukasaun munisípiu maske hetan ameasa hosi rai-halai.
Nune’e, Jaime, husu ba autoridade eskola EBC Iliomar Villa ho ninia estrutura inklui manorin na’in sira atu urjentemente halo kordenasaun ho parte edukasaun munisípu Lautém hodi rezolve kestaun refere.
Tanba, wainhira laiha asaun ne’ebé urjente sei afeita kondisaun eskola EBC refere.
"Eskola ne'e sei afeita erosaun rai-halai Tamba kondisaun rai ne'e ladiak, agora rai monu besik loos eskola ona, hela Sentimu de’it ona maibe laiha Ema ruma atu tau konsiderasaun”, katak Jaime.
Nia husu ba parte relevante Sira atu foti asaun konkretu ba situasaun atúal eskola EBC Iliomar Villa atu nune’e labele hetan estraga hosi dezastre natural iha futuru.
Dadaun maizumenus hamutuk atus hitu resin mak hala’o estudu iha EBC refere.
To’o notisia ne’e publika parte SMI seidauk halo kofirmasaun ba parte Edukasaun Munisípiu Lautém inklui autoridade eskola refere. (Editór, Guido Santos).
