Lospalos-SMI: Komunidade iha Aldeia Ira-Ara, Suku Fuiluro, Postu Administrativu Lospalos, Munisípiu Lautém hamutuk ema na’in atus ida resin (ema na’in 133) hetan apoiu nesesidade baziku hosi Lautém oan sira ne’ebé durante ne’e hala’o serbisu iha Reinu Unidu.
Xefe Aldeia, Ira-Ara, Faustino da Conçeicão Silva, esplika, familia kbi'it-laek hamutuk atus ida resin ne’ebé hetan nesesidade báziku liu-hosi doasaun finanseiru Ira-Ara oan sira ne’ebé dadaun ne’e hala’o hela serbisu iha rai Reinu Unidu nian.
“Komunidade Ira-Ira oan hamutuk 100 resin mak servisu iha ne'eba mak halo Kontribui osan ba familia kibi'it laek”, katak, Faustino Silva, ba jornalista SMI, iha Sede-Aldeira Ira-Ara, Suku Fuiluro, Segunda, (20/07).
Apoiu nesesidade báziku ne’e ho montante orsamentu hamutuk rihun tolu dollar Amerikanu ($.3.000,00 USD) hodi sosa sasan nesesidade báziku hanesan, Fos, Mina, Kafe no masin midar ho Nesesidade Basiku Sira seluk hodi distribui komunidade.
Foku hosi apoiu ne’e ba familia no ema kbi’it laek sira hanesan feto-faluk, oan kiak inklui ho uma-kain ne’ebé iha membru familia barak.
"Benefisiu ne'ebé mak hetan apoiu ne'e ba familia kbi'it laek, ne'ebé mak feto-faluk ho oan kiak sira liu-liu ba Komunidade ne'ebé mak oan barak", tenik Faustino.
Nune’e, autóridade lokál ne’e husu agradesementu wa’in ba familia Ira-Ara oan sira ne’ebé iha Reinu Unidu hodi foti inisiativa hodi apoiu komunidade kbi’it laek sira iha aldeia refere.
Nia konfirma, dadaun ne’e komunidade Ira-Ara nia hamutuk ema na’in 100 ida resin mak halo serbisu iha rai Reinu Unidu nian.
Antese ne'e, grupu apoiu komunidade kbi’it laek sira ne’e mós ajuda uluk ona orsan ho montante Rihun Neen Dolla Amerikanu ($.6.000,00 USD) hodi halo lutu ba semitériu iha aldeia Ira-Ara atu nune’e animal sira labele tama hodi estraga rate no ambiente iha semitériu laran. (Editór, Francisca Costa).