Díli-SMI: Komandante Jerál Polísia Nasional Timor-Leste – PNTL munisípiu Díli, Superintendente Xefe, Hendrique da Costa, hatete, sei halo serbisu hamutuk ho parte Instituto Ciénsia Religiosa – ICR hodi halo sensibilizasaun serbisu polísia kona-ba seguransa tranzitu no krime ba estudante sira bele kompriende ho diak.
“Vizita ida ne’e ko’alia kona-ba relasaun serbisu hamutuk entre ICR ho PNTL sei halo sensibilizasaun serbisu polísia nian, kona-ba krime no tranzitu nian ba estudante ICR nian, nune’e bele komprende ho diak ba asuntu sira ne’e”, dehan, Hendrique da Costa, wainhira hala’o vizita ba ICR iha Lahane-Díli, Tersa, (21/07).
Liu-hosi vizita ofisiál ne’e mós atu introduz komandu PNTL foun ho ninia estrutura ba instituisaun ICR no estudante sira hodi nune’e bele halo relasaun diak iha futuru iha prosesu dezenvolvimentu instituisaun PNTL nian.
Superintedente Xefe, Hendrique da Costa, haforsa, koperasaun entre instituisaun PNTL munisípiu Díli ho ICR ne’e importante hodi sensibiliza informasaun kona-ba serbisu polísial nian ba estudante sira atu nune’e sira bele iha kuiñesementu hodi kontribu ba paz no estabilidade iha rai-laran.
“Serbisu hamutuk entre ICR ho PNTL sei halo sensibilizasaun servisu polisia hodi komprende no kontribui ba paz no estabilidade iha Timor-Leste, importante liu munisípiu Díli, tanba Díli hanesan kapitál nasaun”, dehan nia.
Relasiona ho asuntu koperasaun refere, Reitor ICR, Pe. Crisostomo Salar, agradese no apresia ho inisiativa komandu PNTL munisípiu Díli hodi halo sensibilizasaun serbisu polísia ba estudante ICR.
Nune’e, parte ICR prontu hodi kolabora ba inisiativa komandu PNTL munisípiu Díli nian iha futuru liga serbisu instituisaun seguransa nian.
“Lori estrutura ICR nia naran, sente kontente ho vizita PNTL ida ne’e no prontu serbisu hamutuk hodi kontribui ba serbisu PNTl nian iha munisípiu Díli”, tenik Reitor ne’e.
Tuir Reitor ICR, atu dezenvolve seitor seguransa sai profísional no kualidade presiza iha kontribuisaun hodi parte hotu-hotu taun liu-hosi instituisaun no sidadaun bai-bain. (Editor, Guido Santos).
