Manatuto-SMI: Eis Prezidente Repúblika, José Ramos Horta, halo asaun úniku sira durante ninia viazen privadu iha munisípu parte Leste hanesan munisípiu Lautém, Baucau no Manatuto ne’ebé nakonu ho motivasaun.
Eis Xefe Estadu ne’e hatudu asaun úniku hanesan treinu labarik sira iha area Obratu, munisípiu Manatuto nian wainhira fila hosi ninia viazen durante loron 5 iha postu Administrativu Tutuala, Iliomar inklui Baucau.
Asaun úniku ne’e, Premiadu Nobel da Paz públika iha ninia pajina privadu ho titlu seremónia milítar iha Obrato hamutuk fotográfu halo kontenensia ba malu hanesan milítar. https://www.facebook.com/officialramoshorta/
Iha nia pajina Facebook ne’e, Ramos Horta, hakerek, nia rasik mak haruka ka manda labarik no deside labarik ne’ebé ki’ik liu ho idade tinan 5 mak sai komandante ba parada milítar hodi halo kontenensia ba malu.
“Seremónia milítar iha Obrato. Ha’u rasik forma labarik sira, foti ida ki’ik liu, tinan 5 de’it, ba komandante”, hatete, Ramos Horta, iha ninia pajina Facebook ofisial, Tersa, (04/08).
Idea ka razaun prinsipál hosi eis diplomata hodi halo parada milítar ba labarik sira ne’e, hanesan jestu úniku hodi labarik sira labele rein ninia liman maibe oinsa hodi halo kontenensia hanesan ema milítar de’it.
“Ha'u esplika ba parada ke lábele re'i liman, tenke tuir de’it regra milítar. Labarik sira ne’e hatudu prontu atu tama FFDTL”, tenik, Horta, iha pajina facebook.
Hafoin hatudu asaun úniku hodi anima labarik sira ho parada milítar, Horta kontinua sosa prodútu lokál hosi komunidade sira hanesan batar.
“Seremónia liu-tiha, ha’u sosa batar-nurak”, katak Horta.
Durante vizita iha munisípiu Lautém, eis Primeiru Ministru ne’e mós tuir seremónia kultural no kazamentu iha Postu Administrativu Tutuala nomós vizita Maijor Jenerál, Lere Anan Timur, ninia uma adat iha Postu Administrativu Iliomar. (Editór, Francisca Soares).
