Díli-SMI: Ministra Negósiu Estranjeiru no Koperasaun – MNEK, Adaljíza Magno, informa, Governu deside ona atu fó subsídiu $200 ba faze segundu atu fahe ba estudante naun-bolseiru sira hamutuk ema na’in 30 ne’ebé dadaun ne’e espalla iha nasaun 7 hanesan Singapura, Mosambike, Reinu Unidu, Bangladexe, Bélzika, Xina no Koreia Súl.
Desizaun Governu ne’e bázea ba alterasaun dekretu lei subsídiu naun-bolseiru ba timoroan ne’ebé hala’o estudu iha nasaun estranjeiru relasiona ho reklamasaun durante ne’e nomós iha dekretu dahuluk la involve ho estudante sira nasaun balun.
“Ohin, Konsellu Ministrus aprova ona alterasaun dahuluk dekretu lei ba subsídiu naun-bolseiru ba estudante sira iha rai liur, tamba dekretu uluk la inklui Rai-sira hanesan: Singapura, Mosambike, Reinu Unidu, Bangladexe, Bélzika, Xina no Koreia Súl”, dehan, Ministra, Adaljíza Magno, ba jornalista sira, iha Palásiu Governu hafoin partisipa sorumutuk KM, Kuarta, (16/09).
Ministra, Adaljíza, esklarese, preokupasaun no reklamasaun subsídiu $200 ba estudante naun-bolseiru sira ne’e Governu aprova ona liu-hosi reuniaun Konsellu Jestaun ba Fundu COVID-19 no hein implementa de’it.
Governante ne’e hatutan, subsídiu ba naun-bolseiru sira ne’e Governu deside prevee ba estudante hamutuk ema na’in 560 ne’ebé inklui ho estudante 30 ho totál orsamentu liu $.200 mil no implemeta wainhira alterasaun dekretu lei ne’e hetan ona promulgasaun.
“Liu-hosi reuniaun Konsellu Jestaun ba Fundu COVID-19 ne’ebé prevee ba ema-560, ho totál osan US$ 200 mil resin. Ohin Konsellu Ministrus aprova ona alterasaun dekretu lei refere no se hetan ona promulgasaun maka sei selu tan subsídiu ba ema liu-30”, esplika, Magno.
Relasaun ho estudante sira no timoroan balun ne’ebé hela iha rai-liur ne’ebé hakarak fila mai Timor-Leste, Magno, responde katak, dadaun ne’e parte Governu liu-hosi MNEK hodi buka dalan atu rezolve problema refere.
“Ami trata hela asuntu ne’e, Governu iha hela esforsu atu re-ativa fali aviaun komersiál kada fulan dala-ida no Ministériu Transporte Komunikasaun mak organiza asuntu ne’e, se posivél entaun ita-bele fasilita sidadaun sira fila mai Timor-Leste iha fulan ida dala ida”, tenik nia. (Editór, Guido Santos).
