23
Fri, Oct
3 New Articles

Otelio Ote Husu Mídia Na’in 4 Kontinua Serbisu Hamutuk ho CI

Reprezentante mídia na’in eleitu, Otelio Ote kaer liman ho Konselleiru CI, José Ximenes, iha salaun Delta Nova durante sesaun kongresu. Foto, Mídia CI.

Flash News

Díli-SMI: Reprezentante mídia na’in eleitu ba Conselho de Imprensa - CI, Otelio Ote, husu ba na’in ba mídia boot 4 hanesan Timor Post, INDEPENDENTE, GMN Grup, STL atu kontinua serbisu hamutuk hodi dezenvolve di’ak liu-tan mídia iha Timor-Leste.

“Ha’u hakarak hato’o (husu) ba mídia na’in sira ne’ebé mak la-partisipa iha eventu (kongresu) ida ne’e, liu-liu mídia na’in sira, ha’u dehan ita kontinua servisu hamutuk nafatin tanba komunidade mídia la’os komunidade seluk no komunidade mídia la’os komunidade partidaria, ho nune ita kontinua servisu hamutuk de’it ho vizaun ida hodi deznvolve mídia iha rai-laran”, dehan Otelio Ote, iha Kongresu hili reprezentante mídia na’in ba CI, iha salaun Delta Nova, Tersa, (15/09) foin lalais ne’e.

Ote, hatutan, hanesan reprezentante mídia na’in eleitu ba CI periodu 2020 – 2024 sei esforsu hodi serbisu hamutuk ho mídia na’in sira atu nune’e bele hadi’a di’ak liu-tan kualidade instituisaun mídia iha futuru.

“Ha’u sei serbisu hamutuk ho mídia na’in sira atu oinsa eleva kualidade midia liu-liu kualidade instituisaun mídia sira nomós kualidade jornalizmu en-jerál, hanesan mós reprezentante membru foun ba iha CI ha’u sei servisu maka’as liu-tan”, dehan, eis Diretúr Timor Post ne’e.

Fundador no na’in ba Timor Post ne’e afirma, eventu kongresu hili reprezentante ba CI nu’udar prosesu legál  ida ne’ebé mídia na’in hotu tenke respeitu hodi kontinua kolabora malu atu hadi’a instituisaun mídia no kualidade jornalizmu iha rai-laran.

Maske nue’e, iha kongresu hili reprezentante mídia na’in ba CI ne’e sai polímika tanba mídia boot 4 halo boikota hodi la-tuir eleisaun.

Na’in ba mídia Tempo Timor – TT, José Antonio Belo, mós retira hosi kongresu hodi la-tuir eleisaun ho razaun fó ninia solidaridade ba mídia boot 4 refere.

“Ami solidariza ba mídia mais boot no solidariza ho Conselho de Imprensa. Ejize Conselho de Imprensa rezolve uluk problema entre mídia na’in 4 hanesan STL, GMN Grupo, Timor Post no Independente para sira mós hola parte”, dehan, José Belo.

Nune’e mós, Belo, hatutan, senti konfuzaun no duvida ho kapasidade Conselho de Imprensa hodi organiza kongresu hili reprezentante mídia na’in ba CI maske parte mídia boot sira balun la partisipa.

“Se ita hili reprezentante hili tiha reprezentante ida, reprezentante ida ne’e ba de’it sira agora hili ne’e ka ba mídia hotu-hotu?”, kestiona hosi José Belo.

Belo, konsidera líder Conselho de Imprensa laiha vontade no kapasidade atu rezolve problema ho mídia boot sira antes realiza kongresu ne’e.

Maibe, iha parte seluk, Prezidente CI, Virgílio Guterres, esplika, CI serbisu ho baze legál hodi konvida mídia hamutuk 28 ne’ebé inklui mós mídia boot 4 refere atu tuir kongresu hili reprezentante mídia na’in nian.

“Conselho de Imprensa nia serbisu mak tuir lei. Orgaun komunikasaun sosiál no meiu komunikasaun sosiál ne’ebé ami rejista hamutuk 28, ne’e orgaun komunikasaun sosiál, la sura ho meius komunikasaun sosiál hamutuk 28, naran sira ne’e ami publika ona iha jornál da repúblika, ami konvida sira, ami fó sai konvite atu mai partisipa (kongresu)”, dehan, Virgílio Guteres.

Maske nune’e, Virgílio, rekuiñese katak na’in ba mídia boot sira iha ANM la-marka prezensa iha kongresu tanba Conselho de Imprensa la-simu asuntu balun ne’ebé sira propoin hanesan mídia diretu vota no kandidatu-an iha kongresu tenke mídia ne’ebé eziste tinan 5 ona.

“Lei komunikasaun sosiál laiha definisaun kona-ba durasaun tinan 5 ka mais-menus. Maibe iha kritéria mak órgaun komunikasaun sosiál ne’ebé iha estatutu editorial, konsellu redasaun, iha sede no responsavél. Entaun ami labele simu proposta hosi ANM”, katak, Virgílio.

Ho nune’e, nia fó razaun katak, CI labele hakruk ba ejizensia ANM atu viola fila fali lei hodi limita mídia na’in seluk atu tuir kongresu foin lalais ne’e. (Editór, Francisca Soares). 

Pin It

Follow us on Twitter

Sign up via our free email subscription service to receive notifications when new information is available.