26
Thu, Nov
2 New Articles

KSDS - KE Husu PR Kontinua Estende EE Dahitu

Prezidente Repúblika, Francisco Guterres “Lú Ólo prezide reuniaun Konsellu Superior Defeza no Seguransa ho Konsellu Estadu, iha Palásiu Prezidensiál Aitarak-Laran. Foto, Mídia PR.

Flash News

Díli-SMI: Liu-hosi reuniaun Konsellu Superior Defeza no Seguransa - KSDS ho Konsellu Estadu – KE ho unaminidade hodi husu ba Xefe Estadu, Francisco Guterres “Lú Ólo” atu haruka mensajen ba Parlamentu Nasional hodi autóriza Estadu Emerjénsia – EE dahitu nian.

Xefe Casa Míltar, Coronél, António Soares da Silva “Mau-Kalo”, hateten, órgaun konsultivu rua hosi Estadu nian husu ba Prezidente Repúblika atu kontinua estende EE atu bele halo prevensaun virus corona ho efetivu.   

“Husi Konsellu rua ho unanimidade husu Prezidente Repúblika atu estende nafatin estadu emerjénsia. Timor-Leste nu’udar país ne’ebé ki’ik, ho kondisaun infraestrutura ho rekursu ne’ebé sei menus, tanba ne’e ai-moruk ida ne’ebé di’ak liu ba kombate coronavirus mak prevensaun”, dehan, Mau-Kalo, hafoin reuniuan órgaun konsultivu rua ho Prezidente Repúblika, iha Palásiu Prezidensiál Nicolau Lobato, Aitarak-Laran, Segunda, (26/10)

Razaun hodi husu Xefe Estadu atu fó mensajen ba PN hodi estende EE ne’e relasiona ho pedidu Governu bázea ba dezenvolvimentu virus corona ne’ebé aumenta maka’as iha nivél mundiál nian.

“Pedidu Governu ba estensaun estadu emerjénsia ninian tanba haree ba evolusaun preokupante ba situasaun epidemiolòjika no proliferasaun kazu rejistadu ho COVID-19 ne’ebé aumenta iha nível rejionál no nível mundiál”, katak, Mau-Kalo.

Durante ne’e, surtu corona nu’udar kazu importadu nune’e Governu Timor-Leste hasai medida forte liu-hosi implementasaun EE hodi prevene moras at refere.

Parte implementasaun EE Governu kontinua aplika medida prevensaun liu-hosi selu multa ba sidadaun sira ne’ebé kontra regra wainhira ultra-pasa fronteira.

“Governu implementa medidas prevensaun liu-hosi selu multa ba sira ne’ebé la kumpre regras tanba númeru sidadaun sira halo pasajen ilegál iha fronteira terrestes aumenta”, tenik nia.

Medida prevensaun ho selu multa ne’e atu bele fó atensaun ba komunidade hodi labele hakat fronteira ho ilegálmente maibe tenke tuir protokolu saúde nian.

Tanba wainhira  tama no sai ilegalmente mai territóriu nasionál bele lori risku ba propagasaun moras virus corona iha komunidade nia leet.

Nasaun Timor-Leste rejista kazu pozitivu ho COVID-19 na’in-1 desde 21 Marsu to’o ohin loron, ema na’in 28 rekuperadu no laiha ema ida mak mate. (Editór, Guido Santos).

 

Pin It

Follow us on Twitter

Sign up via our free email subscription service to receive notifications when new information is available.