Díli-SMI: Problema bee-moos ne’ebé Governu seidauk rezolve dezde nasaun ne’e hetan ninia independensia fó impktu komunidade suku balun iha kapitál Díli tenke sosa bee-moos hosi kompañia sira hodi uza ba nesesidade lor-loron nian.
Henrique Amona, nu’udar komunidade aldeia Temporal, suku Lahane Oriental, Postu Administrativu Na’in Feto, Munisípiu Díli, lamenta ho kondisaun atúal ne’ebé sira infrenta tanba tenke sosa bee-moos hosi kompañia hodi uza ba nesesidade família nian.
“Durante tinan 10 komunidade Temporal la asesu ba bee-moos, tanba nee komunidade Temporal ho obrigatóriu tenke sosa bee-moos hosi kompañia hodi uza ba nesesidade lor- loron. Bee-moos ne’ebé komunidade Temporal sosa hosi kompañia kada litru lima, ho folin sentavus sanulu bee mos”, dehan, Henrique, ba SMI iha Suku Lahane, Tersa, (24/11).
Sekretáriu Suku Lahane Oriental, Leonor da Costa dos Reis, rekuiñese duni katak komunidade aldeia Temporal susar tebes ba asesu bee-moos durante ne’e.
Tuir dadus suku nian, maizumenus komunidade hamutuk atus tolu resin mak durante ne’e hetan dikuldade atu asesu bee-moos tanba kanu bee hetan estragu no to’o ohin loron Governu seidauk hadi’a fali.
“Iha aldeia Temporal ho komunidade hamutuk atus tolu resin, susar tebes asesu ba bee-moos, tanba impaktu hosi bailoron naruk no besi kanu ne’ebe uza ba dada bee-moos hetan estragus totál”, dehan nia.
Kabe ba preokupasaun komunidade suku Lahane Oriental nian, Diretúr Nasionál Servisu Agua – DNSA, Eduardo Dias Ximenes, parte DNSA sei halo verifikasaun ba kanu bee ne’ebé hetan ona estragu hodi hadi’a nune’e bele fornese bee-moos ba komunidade.
“Iha tempu badak dirasaun nasionál servisu agua, se halo verefikasaun hodi identifika ba uma kain ida - idak iha aldeia Temporal ne’ebé seidauk asesu ba bee-moos. Sei hadi’a kanu bee ne’ebé hetan estragus hosi udan-boot”, tenik nia.
Tuir observasaun SMI problema bee-moos la’os de’it sai preokupasaun komunidade iha kapitál nasaun maibe mós mai hosi komunidade sira iha area rural sira iha teritóriu laran. (Editór, Caleri Alves).