Díli-SMI: Eis prizoneiru Cipinang – Indonézia, Virgílio da Silva Guterres “Lamukan” trava ambisaun reprezentante membru Conselho de Imprensa – CI eleitu hosi Parlamentu Nasional – PN, Expedito Dias Ximenes, hodi tuur iha kadeira prezidente durante periodu 2021 – 2025.
Expedito Ximenes, esplika, liu-hosi primeiru plenaria hodi hili prezidente ho eleisaun sekretu nia hetan de’it votu rua hosi totál membru konselleiru na’in 5 ne’ebé halo votasaun.
Maibe Expedito Dias Ximenes, klarifika, maske lakon iha eleisaun ho votu 2 de’it maibe kontinua apoiu no suporta prezidente eleitu hodi kontribui ba instituisaun CI ninia misaun.
“Iha plenária ne’e eleitu mos ba presidente CI, lakon ho votos rua de’it. La’os la-hetan konfiansa hosi kolega na’in lima, la signifika atu hamenus (ha’u) nia servisu ka kontribuisaun ba CI. Ha’u (sei) kontribui tuir ha’u nia kapasidade ne’ebé maka iha”, dehan, Expedito, ba jornalista sira iha Edifísiu CI, Kintal-Boot, Segunda, (25/01) hafoin remata prosesu eleisaun.
Iha parte seluk, Virgílio da Silva Guterres, agradese ba konfiansa hosi membru na’in CI foun na’in 5 ne’ebé delega ba nia liu-hosi eleisaun hodi kontinua lidera instituisaun importante hanesan CI hodi garante Liberdade espresaun no Liberdade imprensa iha Timor-Leste.
“Agradese wa’in ba konfiansa ne’ebé mak mai hosi mambru na’in Lima ne’ebé mak eleje ha’u sai Prezidente Conselho de Imprensa durante tinan haat mai tan”, dehan, Virgílio Lamukan.
Atúal Prezidente CI ne’ebé babain bolu “Gill Lamukan” esplika, prosesu votasaun ne’e reprezenta natureza CI hodi garante Liberdade espresaun no Liberdade imprensa iha rai-laran.
“Prosesu votasaun simples ida-ne’e reprezenta ona natureza CI nian no Conselho Imprensa moris atu defende liberdade imprensa no liberdade espresaun iha Timor-Leste ne’ebé mak kompostu hosi membru na’in-lima. Na’in lima ne’e bele hatudu katak liman fuan lima ne’e hamutuk mak bele hodi halo buat ruma”, dehan, eis prizoneiru Jakarta Cipinang ne’e.
Membru foun seluk hosi reprezentante mídia, Otelio Ote, hatete, eleisaun prezidente CI liu tiha ona no ba oin hamutuk ho membru foun seluk atu konsentra hodi rezolve no tau-matan ba kualidade jornalítiku iha rai-laran.
“Resolve konteúdu jornalístiku, kona-ba kualidade jornalístiku no CI iha poder mós atu esplika ka mediador ba mídia na’in sira atu konsentra de’it ba kualidade jornalizmu atu nakloke-an atu partisipa ativu iha programa no formasaun ne’ebémaka CI oferese”, deha, Otelio Ote.
Tuir rezultadu eleisaun hatudu katak, atúal Prezidente CI, Virgílio da Silva Guterres “Lamukan” hetan votu 3 no Expedito Dias Ximenes hetan de’it votu 2 hosi totál membru na’in 5 ne’ebé eleje ninia diretu vota durante eleisaun refere. (Editór, Rui Santos).
