Díli-SMI: Komandu Jerál Polísia Nasional Timor-Leste – PNTL, Komisariu, Faustino da Costa, informa, tuir lista membru polísia hamutuk rihun hat (4000) mak manda ona ba parte Ministériu Saúde – MS atu hetan vasinasaun AtraZeneca tanba durante ne’e hala’o serbisu iha liña frente.
“Lista membru PNTL ne’ebé enkamina ba Ministeriu Saude kuaje nain 4000 inklui funsionariu sivil PNTL nian. PNTL halao seguransa iha fatin risku hanesan iha fronteira, Kuarantena, izolamentu tanba ne’e ho imunizasaun ne’e bele proteze sira nia saude”, dehan, Faustino da Costa, hafoin halo lansamentu programa vasinasaun iha Kuartel Jerál PNTL, Kaikoli, Sexta, (16/04).
Komisariu, Faustino da Costa, apela ba ninia membru sira ne’ebé durante ne’e hala’o serbisu iha liña frente presiza tebes hetan vasinasaun hodi nune’e bele kontinua ho imunidade forte hodi serbi povu no nasaun iha ámbitu kombate COVID-19.
Tan-ne’e, Faustino, husu ba membru polísia sira iha teritóriu latan atu uza oportunidade refere hodi kontribui programa Governu kona-ba vasinasaun ne’e.
“PNTL hanesan instituisaun estadu autoridade seguransa ne’ebé hola parte iha lina frente ba kombate propagasaun virus COVID-19, entaun ne’e oportunu tebes se ita-boot sira akompaña karik iha fatin sira halo atendementu ba vasina sira ne’e imi hola parte iha vasina ida ne’e”, katak, Faustino.
Líder instituisaun polisial ne’e, hatutan, membru polísia ka funsionariu sivil sira iha instituisaun PNTL sei hola parte iha programa vasinasaun atu nune’e labele hetan moras hosi COVID-19.
“Membru PNTL hotu tantu funsionariu sivil sira ne’ebé maka serbisu iha instituisaun PNTL ne’e hola parte iha vasinasaun nune’e wainhira sira hala’o sira nia servisu labele lori ou transmite fali moras wainhira fila husi serbisu fatin ba uma. Tanba PNTL halao seguransa iha fatin risku hanesan iha fronteira, Kuarantena, izolamentu tanba ne’e ho imunijasaun ne’e bele proteje sira nia saude”, tenik nia.
Iha oportunidade refere, Piter Brandão, nu’udar médiku Jerál, esplika, wainhira hetan vasinasaun sei akontese reazen sira hanesan isin manas, sente bedoko, ulun moras, mear, isin moras, sente laran-sae presiza hemu lalais aimoruk paracetamol no wainhira laiha reazen mak la presiza hemu aimoruk refere.
“Wainhira sente mosu sinal sira isin manas, ulun-moras, sente bee-doko no seluk tan bele hemu aimoruk paracetamol hodi wainhira mosu sinal hirak ne’e ita bele hemu aimoruk Paracetamol deit no ba sira ne’ebe mka laiha reaksaun la presiza hemu aimoruk”, katak, Piter.
Tuir aprezentasaun relatóriu durante enkontru Konsellu Ministru – KM, Tersa, (14/04) katak maizumenus timoroan hamutuk ema rihun rua atus sia hitu (2.907) mak simu ona vasina atrazeneca hodi prevene an hosi virus corona.
Hosi totál ema ne’ebé simu ona vasina ne’e kompostu hosi mane hamutuk rihun ida atus hitu hat nolu resin rua (1.742) no feto hamutuk atus ualu ualu nolu resin hitu (887). (Editór, Lariwa).
