Díli-SMI: Primeiru Ministru – PM, Taur Matan Ruak, hatete, obra sira hanesan ponte no estrada sira ne’ebé durante tinan 20 nia laran Governu anteriór sira halo laiha kualidade tanba hetan estragus bebeik wainhira mosu udan boot, nune’e VIII Governu sei hadi’a ho kualidade maske tenke gasta orsan boot.
“Tinan 20 ita haree obra hotu-hotu ne’e problema boot, dalaruma ita hanoin dehan ida-ne’e karun liu, mas laiha obra ida mak nia kustu ne’e baratu depois ita hakarak nia dura, normalmente buat ne’ebé baratu ne’e nia ladura”, dehan, Xefe Governu, Taur Matan Ruak, wainhira hala’o observasaun ba mota iha Hera, Dumingu, (18/04), foin lalais-ne’e.
Taur, hatutan, parte Governu dadaun ne’e halo ona planu rekonstrusaun ba ponte no estrada sira ne’ebé hetan estragus tanba impaktu hosi inundasaun iha loron 04 fulan Abril, semana hirak liu-ba ne’e.
“Governu daudauk ne’e prepara hela planu rekonstrusaun ba estragus sira, tanba prátikamente iha munisípiu Díli hosi Hera to’o Tasi-Tolu iha tinan ida-ne’e (2021) udan estraga boot loos, nune’e Governu haree hela ba planu rekonstrusaun nian. Fatin sira ne’ebé hetan estragus ne’e labele halo ohin, tinan oin halo fila-fali, tinan oin halo rekoperasaun, tinan oin halo fila-fali, maibé tenke halo projetu sira ne’e ho di’ak no kualidade”, katak, eis Prezidente Repúblika ne’e.
Durante vizita, Xefe Governu deside katak urjente tebes atu halo normalizasau ba mota-Ki’ik iha Hera atu bele proteze komunidade nia hela fatin ne’ebé besik iha mota refere.
Nune’e, Taur, informa tan, dadaun ne’e Governu foku ba situasaun emerjénsia hodi fó apoiu umanitáriu ba komunidade no halo normalizasaun infra-estrutura ne’ebé hetan sobu tanba impaktu hosi inundasaun foin lalais ne’e.
“Presiza duni halo koreasaun ba mota inklui halo moru protesaun ne’ebé seguru nune’e bele proteje komunidade nia hela fatin liuliu komunidade ne’ebé hela besik mota Mota-Ki’ik. Governu nia fokus iha situasaun emerjénsia ne’e mak halo uluk atendimentu ba populasaun sira afetadu, aliende halo servisu emerjénsia hodi normaliza estrada, moru sustentasaun mota, riin eletrisidade no kanu bee-moos ne’ebé destruídu atu bele la’o normál fila-fali”, Tenik nia.
Hodi bele garante kualidade obra ba oin, parte Governu kria ekipa infraestrutura hodi halo identifikasaun no halo estimasaun ba estragus antes planu rekonstrusaun ba infraestrutura sira ne’ebé naksobu ba médiu no longu prazu nian. (Editór, Caleri).
