Díli-SMI: Durante semana ikus periodu implementasaun kalámidade entre loron 23 to’o 29 parte Polisia Nasional Timor-Leste – PNTL kaptura sidadaun timoroan feto ida ho idade (40) wainhira fila hosi Indonézia hodi hakarak ilegál área fronteira Tunu-Bini, Maliana.
“Iha loron 25/04 Oras 15:15 Otl PNTL kaptura sidadaun feto ida naran Francisca Goncalves (40) hela iha suku Holsa postu administrativu Maliana munisípiu Bobonaro tama Ilegál mai-hosi Nasaun Indonézia liu iha área Tunu-Bibi”, katak, Porta-voz PNTL, Superintendente Xefe, Arnaldo Araújo, iha Kuartel Jerál, Kaikoli-Díli, foin lalais ne’e.
Tuir kronolójia katak sidadaun feto ho naran Francisca Gonsalves ne’e sai-hosi munisípiu Bobonaro hodi ba vizita ninia família iha Atambua-Indonéziu fim Dezembru 2020 no hela durante fulan 3 hafoin fila mai rai-laran iha semana ikus fulan Abril 2021.
“Tuir kronolójia iha loron 29 Dezembru 2020, Sra.Francisca sai hosi Bobonaro ba vizita nia família iha Indonéziu no iha loron 25 Abril 2021 fila hosi nasaun Indonéziu liu-hosi dalan ilegál mai Timor-Leste”, tenik, Superintendente Xefe, Arnaldo Araújo.
Porta-voz ne’e esplika, hafoin kaer sidadaun refere no polísia lori kedan hodi entrega ba parte saúde munisípiu Bobonaro nian ne’ebé dadaun ne’e hala’o hela kuarantina tuir lei Estadu Emerjénsia – EE nian ne’ebé implementa iha rai-laran.
Kazu seluk ne’ebé parte PNTL rejista mak hanesan kazu insidente sira hamutuk 51 no asidente kamaan sira hamutuk 14 durante periodu kalámidade nian.
“Kazu insidente ne’ebé maka PNTL rejista maka hanesan Violensia Domestika 13, Baku Malu 10, Asaltu 23, Ema Tama illegal 1 no Ema mate na’in 1 alende ne’e rejista mós asidentes trafegu kma’an hamutuk 14”, tenik Arnaldo.
Rejista mós kazu seluk mak hanesan tara-an (suisidíu) hamutuk 3 ne’ebé kompostu hosi feto ema na’in 2 mak vítima ho naran Livia Belo Freitas (26), hosi munisipiu Baucau, postu administrativu no BaguiaJulieta Cristina Ximenes (23), hosi postu administrativu Bagui, nomós vítima Graciano Soares (26), hosi munisípiu Ermera, postu administrativu Railaku. (Editór, Zé Amaral).
